معروف بھارتی اداکار نوازالدین صدیقی نے سابق اہلیہ عالیہ پانڈے اور اپنے بھائی شمس الدین صدیقی کے خلاف ہتک عزت پر 100 کروڑ بھارتی روپے ہرجانے کا دعویٰ داخل کر دیا ہے۔
بھارتی میڈیا کے مطابق نوازالدین صدیقی نے سابق اہلیہ اور بھائی پر جھوٹے الزامات کے ذریعے ہراساں کرنے اور ساکھ کو نقصان پہنچانے پر ہرجانے کا دعویٰ داخل کیا ہے۔
مقامی عدالت میں اپنے وکیل سنیل کمار کے ذریعے داخل کی گئی درخواست میں اداکار نے استدعا کی کہ سابق اہلیہ اور بھائی کو پابند کیا جائے کہ وہ سوشل میڈیا سے ان پر لگائے گئے جھوٹے الزامات پر مبنی مواد ہٹا کر آئندہ کے لیے سوشل میڈیا پلیٹ فارم یا کسی دوسرے ذریعے سے ان پر جھوٹے الزامات نہیں لگائیں گے اور تحریری صورت میں تمام جھوٹے الزامات پر معافی مانگیں گے۔
نوازالدین صدیقی نے اپنی درخواست میں بھائی پر مالیاتی فراڈ اور دھوکا دہی کے الزامات عائد کرتے ہوئے یہ بھی استدعا کی کہ بھائی کی جانب سے سابق اہلیہ کے ساتھ مل کر فراڈ کے ذریعے ہتھیائے گئے 21 کروڑ روپے واپس دلوائے جائیں۔ انہوں نے دعویٰ کیا کہ بھائی اور سابق اہلیہ کی جانب سے جھوٹے الزامات
لگانے باعث ان کا 100 کروڑ سے زائد کا نقصان ہوا ہے جس کا ازالہ کیا جائے۔
مقامی عدالت کے جج ریاض چھاگلہ 30 مارچ کو کیس کی سماعت کریں گے۔ فریقین کو نوٹس بھجوا دیئے گئے ہیں
