آئی سی سی مینز ٹی20 ورلڈ کپ میں افغانستان کی ٹیم نے سنسنی خیز مقابلے میں بنگلادیش کو ہرا کر پہلی بار سیمی فائنل میں جگہ بنائی، اس میچ سے جڑے ایک واقعے نے افغانستان کی جیت کو مشکوک بنا دیا جب افغانستان کرکٹ ٹیم کے کوچ جوناتھن ٹراٹ کھلاڑیوں کو گیم کو سست کرنے کا اشارہ کیا اور عین اسی وقت گلبدین نائب ہیمسٹرنگ کا بہانہ کرکے زمین پر ایسے گرے جیسے ان کا اٹھنا مشکل ہوگیا ہو۔ ایسے میں کمنٹیٹر نے قہقہ لگاتے ہوئے گلبدین کی بہترین اداکاری پر کہا کہ انہیں آسکر دیا جائے یا ایمی۔
مزید پڑھیں
گلبدین نائب کی ایکٹنگ پر جہاں صارفین کی جانب سے دلچسپ تبصرے کیے جا رہے ہیں۔ وہیں افغانستان کے فاسٹ باؤلر نوین الحق نے بھی گلبدین نائب کی انجری کے ڈرامے پر بالی ووڈ فلم ’ویلکم‘ کے ایک سین پر مبنی مزاحیہ میم شیئر کرتے ہوئے ان کے ڈرامے کا بھانڈا پھوڑ دیا۔ انہوں نے فلم کے کردار ’بلو‘ کی جگہ نوین الحق کا چہرہ لگا دیا جو فلم میں لاٹھی کے سہارے لنگڑا کر چلتا ہے لیکن اصل میں معذور نہیں ہوتا اور مشکل میں آنے پر تیزی سے بھاگتا نظر آتا ہے۔
نوین الحق نے میم پوسٹ کر کے کیپشن میں ساتھی کرکٹر سے معافی مانگتے ہوئے لکھا کہ ’معذرت گلبدین لیکن اسے پوسٹ کرنا لازمی تھا۔‘
View this post on Instagram
گلبدین نائب نے نوین الحق کی پوسٹ پر تبصرہ کرتے ہوئے کہا کہ میری طبیعت ٹھیک نہیں ہے ہیمسٹرنگ کا مسئلہ ہے جبکہ دیگر کھلاڑیوں نے اس پر قہقہوں والے ایموجیز کا اضافہ کیا۔
صارفین کی جانب سے گلبدین نائب کی انجری کو ان کی اداکاری قرار دیا جا رہا ہے۔ اور شائقین کرکٹ کا کہنا ہے کہ افغان ٹیم دھوکے سے سیمی فائنل میں پہنچی ہے۔
خیال رہے ٹی ٹوئنٹی ورلڈ کپ کے سیمی فائنل راؤنڈ کے لیے گروپ 1 سے بھارت اور افغانستان جبکہ گروپ 2 سے انگلینڈ اور جنوبی افریقا نے کوالیفائی کیا ہے۔
ٹی20 ورلڈ کپ میں پہلا سیمی فائنل 27 جون کو افغانستان اور جنوبی افریقہ کے درمیان ٹرینیڈاڈ اینڈ ٹوباگو میں کھیلا جائے گا جبکہ ایونٹ کا دوسرا سیمی فائنل بھی 27 جون کو ہوگا جو گیانا میں انگلینڈ اور انڈیا کے درمیان کھیلا جائے گا۔
