نیویارک کے ایک گھر کے صحن میں مختلف حیران کن شرارتیں کرتے ہوئے جنگلی ریچھ کی ویڈیو وائرل ہوگئی۔
یہ دلچسپ واقعہ نیویارک کے ’واپِنگرز فالز‘ نامی گاؤں کی رہائشی خاتون اینا کوری واٹسن نے ایک روز اچانک اپنے گھر کے صحن میں ایک جنگلی ریچھ کو دیکھا جو مختلف شرارتیں کر رہا تھا۔ خاتون نے فوراً موبائل اٹھایا، اور ویڈیو بنانا شروع کردی۔ پھر اسے یوٹیوب پر پوسٹ کردیا۔
ویڈیو میں دیکھا جا سکتا ہے کہ کالے رنگ کا ریچھ فٹ بال سے کھیلتے کھیلتے گھاس پر لیٹ جاتا ہے۔
پھر صحن میں پڑے ہوئے پانی کے پائپ کو منہ سے کھینچ کر ایک جگہ اکھٹا کر تے کرتے گھاس پر لیٹ جاتا ہے، پھر پائپ کو منہ میں ڈال لیتا اور اس کے ساتھ اٹھکھیلیاں کرنے لگتا ہے۔
یہی نہیں جب پائپ سے کھیلتے کھیلتے اُس کا جی بھر جاتا ہے تو وہ صحن میں لگے جمپنگ جھولے میں چلا جاتا ہے اور اُس کا بھی اندر سے معائنہ کر کے باہر آجاتا ہے۔
پھر ریچھ کو پتہ نہیں کیا سوجھتی ہے کہ وہ صحن میں رکھے ہوئے جھاڑو کو اٹھا لیتا ہے۔ شاید اُس نے سوچا ہو کہ کھیل کے بعد اب صحن کی صفائی کر لینا بہتر ہو گا۔
اینا کوری کا کہنا ہے کہ اس نے جب اپنے گھر کی کھڑکی سے صحن میں جھانکا تو وہ ایک کالے رنگ کے ریچھ کو صحن میں رکھی مخلتف چیزوں سے کھیلتا دیکھ کر حیران رہ گئی۔
خاتون کا کہنا تھا کہ ریچھ کو دیکھ کر مجھے بہت خوشی ہوئی، میں جانتی تھی کہ میں ایسا منظر دیکھ رہی ہوں جسے دوبارہ دیکھنا ممکن نہ ہو۔
خاتون نے کہا کہ ’میں نے فوراً اپنا فون اٹھایا اور ویڈیو بنانا شروع کر دی، اگرچہ مجھے اس سارے منظر پر یقین نہیں آرہا تھا۔
اینا کوری نے بتایا کہ ریچھ ان کے صحن میں چند گھنٹے تک کھیلتا رہا۔
