پی ٹی آئی رہنما نے سابق وفاقی وزیر فواد چوہدری پر الزام عائد کیا ہے کہ وہ سابق آرمی چیف جنرل قمر جاوید باجوہ سے ملے ہوئے تھے اور پی ٹی آئی حکومت کا تختہ الٹنے کے معاملے میں بھی ان کا کردار تھا۔
جمعرات کو ایک بیان میں شیر افضل مروت نے دعویٰ کیا کہ انہیں عمران خان نے بتایا تھا کہ ’رجیم چینج آپریشن‘ میں فواد چوہدری کا کردار مشکوک تھا اور وہ جنرل قمر جاوید باجوہ سے ملے ہوئے تھے۔
’فواد چوہدری پر کیسز ان کی فرمائش پر ہی بنے، جیل میں بھی ان کی سیٹنگ تھی‘
شیرافضل مروت نے کہا کہ فواد چوہدری پر مقدمات ان کی ہی فرمائش پر بنے تھے اور جیل میں بھی ان کی مکمل سیٹنگ تھی جہاں وہ وی آئی پی انداز میں رہے۔
’بیگانی شادی میں عبداللہ دیوانہ‘
انہوں نے کہا کہ فواد چوہدری بن بلائے مہمان اور پرائی شادی میں عبداللہ دیوانے کی طرح ہمارے خلاف بول پڑے اور لگتا ہے کہ پی ٹی آئی رہنماؤں کو نشانہ بنانے کا ٹاسک بیرون ملک کچھ صحافیوں کو بھی ملا ہے۔
یہ بھی پڑھیں: رجیم چینج کی سازش امپورٹڈ نہیں بلکہ ایکسپورٹڈ تھی، عمران خان
ان کا کہنا تھا کہ فواد چوہدری کے پاس ہم پر تنقید کرنے کی کوئی اخلاقی وجہ نہیں ہے کیوں کہ جب پارٹی کو حوصلے کی ضرورت تھی تو وہ خود اور ان جیسے دوسرے لوگ بھاگ گئے تھے۔
شیر افضل مروت نے کہا کہ لاہور ہائیکورٹ کےسامنے میری گرفتاری ہوئی مگر میں نہیں بھاگا۔
’پی ٹی آئی جہلم فواد چوہدری کی پارٹی میں دوبارہ شمولیت کے خلاف ہے‘
انہوں نے کہا کہ پی ٹی آئی جہلم نےلکھ کردیا ہے کہ اگر فواد چوہدری پارٹی میں آئے تو وہ پارٹی چھوڑدیں گے۔
یہ بھی پڑھیے:تحریک انصاف کا فواد چوہدری سے رابطہ، قیادت کیخلاف تنقید نہ کرنے کی درخواست
ان کا کہنا تھا کہ اگر فواد چوہدری پارٹی میں آجاتے ہیں تو پھرباقی لوگوں کا کیا قصور ہے انہیں بھی واپس لے لینا چاہیے۔
’فواد چوہدری نے عمران خان سے متعلق جھوٹ بولا‘
شیر افضل مروت نے کہا کہ فواد چوہدری کہہ رہے ہیں کہ وہ عمران خان کے کہنے پر علیم خان اور جہانگیر ترین گروپ میں گئے جو سراسر جھوٹ ہے۔
مزید پڑھیے: فواد چوہدری بھگوڑے ہیں ان کی بات کا کیا جواب دوں؟ پی ٹی آئی رہنما شبلی فراز
انہوں نے مزید کہا کہ فواد چوہدری جنرل باجوہ کو ہماری خبریں پہنچاتے اور پیغام رسانی کا کام کررہے تھے۔ انہوں نے مزید کہا کہ وہ پی ٹی آئی کے مفادات کے خلاف کام کر رہے تھے اس لیے پارٹی ان کے کردار کو شک کی نگاہ سے دیکھتی ہے
’عمران خان نے مجھے ملاقات کے لیے بلالیا ہے‘
شیر افضل مروت نے بتایا کہ پی ٹی آئی کے بانی چیئرمین عمران خان نے انہیں بلایا ہے۔ انہوں نے مزید بتایا کہ 15 یا 16 جولائی تک ان کی عمران خان سے ملاقات ہو جائے گی۔
