خیبرپختونخوا کے علاقے شمالی وزیرستان میں سیکیورٹی فورسز اور دہشتگردوں کے درمیان فائرنگ کا تبادلہ ہوا ہے، جس کے نتیجے میں 2 دہشتگردوں کو ہلاک کردیا گیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے دہشتگردوں کے ٹھکانے پر کارروائی کی تو اس دوران فائرنگ کا تبادلہ ہوگیا۔
یہ بھی پڑھیں افغانستان سے دہشتگردی کے ثبوت موجود، دشمن کے ٹھکانوں پر کارروائی ہمارا حق ہے، وزیر دفاع خواجہ آصف
آئی ایس پی آر نے بتایا کہ فائرنگ کے تبادلے میں فورسز نے 2 دہشتگردوں کو ہلاک کیا، تاہم اس دوران پاک فوج کے آفیسر کیپٹن محمد اسامہ بن ارشد بہادری سے لڑتے ہوئے شہید ہوگئے۔
آئی ایس پی آر کے مطابق علاقے سے دہشتگردوں کے خاتمے کے لیے کلیئرنس آپریشن جاری ہے۔
شعبہ تعلقات عامہ نے کہاکہ پاکستان کی سیکیورٹی فورسز ملک سے دہشتگردی کی لعنت کے خاتمے کے لیے پُرعزم ہیں، ہمارے بہادر جوانوں کی قربانیاں ہمارے عزم کو مزید مضبوط کرتی ہیں۔
واضح رہے کہ شہید ہونے والے کیپٹن محمد اسامہ بن ارشد کا تعلق ضلع راولپنڈی سے ہے۔
یہ بھی پڑھیں وزیر اعظم نے دہشتگردی کے خاتمے کے لیے آپریشن ’عزم استحکام‘ کی منظوری دیدی
کیپٹن محمد اسامہ بن ارشد نے اکتوبر 2020 میں پاک فوج کی این ایل آئی رجمنٹ میں کمیشن حاصل کیا۔
کیپٹن محمد اسامہ بن ارشد شہید کی عمر 24 سال تھی، جنہوں نے 4 سال تک دفاع وطن کا مقدس فریضہ انجام دیا، جبکہ شہید کے سوگواران میں والد، والدہ، ایک بھائی اور چار بہنیں شامل ہیں۔
