وفاقی حکومت کی جانب سے عراق جانے والے زائرین کو زیادہ سے زیادہ سہولیات کی فراہمی کے لیے کوششیں اور اقدامات کیے جارہے ہیں۔ اس ضمن میں وفاقی وزیر داخلہ محسن نقوی اور وفاقی وزیر اوورسیز پاکستانیز و مذہبی امور چوہدری سالک حسین نے اسلام آباد میں عراق کے سفیر حامد عباس لفتہ سے ایک انتہائی اہم ملاقات بھی کی ہے۔
وزارت داخلہ میں ہونے والی اس ملاقات میں وزیر داخلہ محسن نقوی نے عراقی سفیر سے عراق جانے والے زائرین کو بغیر فیس انٹری ویزا دینے اور رواں سال زائرین کا کوٹہ دگنا کرنے کا مطالبہ کیا ہے۔ انہوں نے کہا کہ عراقی حکومت کی جانب سے زائرین کو بغیر فیس انٹری ویزا کی اجازت ملنے کی صورت میں زائرین کو بہت سہولت ملے گی۔
یہ بھی پڑھیں: وزیر خارجہ بلاول بھٹو کا دورہ عراق؛ اہم مفاہمتی یادداشتوں پر دستخط
انہوں نے کہا کہ پاکستانی زائرین سے عراق میں داخلے پر پاسپورٹ نہ لیے جائیں کیونکہ اس سے انہیں واپسی میں مشکلات درپیش آتی ہیں۔ عراقی سفیر نے وزیر داخلہ کو ان معاملات اور زائرین کے لیے بہترین سہولتوں کی فراہمی میں مکمل تعاون کی یقین دہانی کرائی۔
زائد فیس وصول کرنے والے ٹریول ایجنٹس کے خلاف کارروائی
ملاقات کے دوران عراقی سفیر نے وزیر داخلہ کو ان ٹریول ایجنٹس کی فہرست فراہم کی جنہوں نے زائرین سے غیرقانونی طور پر زائد فیس وصول کی۔ وزیر داخلہ نے کہا کہ پاکستانی زائرین سے غیرقانونی طور پر زائد فیس وصولی میں ملوث ٹریول ایجنٹس کے خلاف ایک ہفتہ میں کارروائی یقینی بنائی جائے گی۔
یہ بھی پڑھیں: ایران نے پاکستانی زائرین کے لیے ویزا پالیسی کا اعلان کردیا
انہوں نے کہا کہ ہر سال لاکھوں پاکستانی زیارات کے لیے عراق جاتے ہیں، محرم اور صفر کے مہینوں میں زائرین کو کئی مشکلات پیش آتی ہیں، ہماری کوشش ہے کہ زائرین کو ہر ممکن سہولیات فراہم کی جائیں۔
عراق کے لیے ور پرمٹ کا حصول
ملاقات میں ڈپلومیٹک اور آفیشل پاسپورٹ پر ویزا کی چھوٹ کے معاہدہ کو جلد حتمی شکل دینے پر اتفاق ہوا۔ ملاقات میں وزارت سمندر پار پاکستانیز اورعراق کی وزارت لیبر کے مابین ایم او یو پر جلد دستخط کرنے پر بھی اتفاق کیا گیا۔
یہ بھی پڑھیں: ویژن 2030: مدینہ منورہ میں پروقار عمرہ فورم کا انعقاد
وفاقی وزیر سالک حسین نے کہا کہ اس ایم او یو کے فعال ہونے سے پاکستانی شہریوں کو عراق کے لیے ورک پرمٹ حاصل کرنا آسان ہوگا۔ اس ایم او یو سے قانونی امیگریشن بڑھے گی اور غیرقانونی طریقوں سے داخلہ میں کمی واقع ہو گی۔
واضح رہے کہ گزشتہ برس پاکستان نے عراق کے ساتھ باہمی دوطرفہ ثقافتی تعاون بڑھانے کے معاہدے پر دستخط کیے تھے، جس کے تحت سفارتی اور سرکاری پاسپورٹ کے حامل حکام کے لیے ویزوں کے خاتمے کی پالیسی پر بھی اتفاق رائے کیا گیا تھا۔
