پاکستان نے عراق کے ساتھ باہمی دو طرفہ ثقافتی تعاون بڑھانے کے معاہدے پر دستخط کیے ہیں، جس کے تحت سفارتی اور سرکاری پاسپورٹ کے حامل حکام کے لیے ویزوں کے خاتمے کی پالیسی پر بھی اتفاق رائے کیا گیا ہے۔
وزیرِ خارجہ بلاول بھٹو نے اپنے عراقی ہم منصب سے باضابطہ ملاقات کے بعد ایک مشترکہ پریس کانفرنس کرتے ہوئے کہا ہے کہ پاکستانی زائرین کی بہت بڑی تعداد ہر سال عراق آتی ہے، امید ہے دونوں ممالک کے درمیان باہمی تعاون مزید فروغ پائے گا۔
بلاول بھٹو زرداری کا کہنا ہے کہ پاکستان اور عراق کے درمیان گہرے برادرانہ تعلقات ہیں۔ پاکستان اور عراق نے ہمیشہ مشکل وقت میں ایک دوسرے کا ساتھ دیا۔ انہوں نے عراق کے دورے پر خوشی کا اظہار کیا۔
Delighted to meet my brother @Fuad_Husseein, FM of Iraq. Had wide ranging discussion on all issues. I’m grateful to the Govt. of 🇮🇶 for its support in opening of 🇵🇰 consulate in Najaf. We signed important MoUs & resolved to unlocking huge potential in our dynamic bilateral coop. pic.twitter.com/Yym5ZxZD7u
— BilawalBhuttoZardari (@BBhuttoZardari) June 5, 2023
وزیر خارجہ بلاول بھٹو نے عراقی وزیر خارجہ سے ملاقات کے بعد اپنے ایک ٹوئیٹ میں بتایا ہے کہ ان کی اپنے عراقی ہم منصب سے مختلف دو طرفہ امور پر تفصیلی تبادلہ خیال کیا ہے۔
بلاول بھٹو نے حکومت عراق کا شکریہ اداکرتے ہوئے کہا ہے پاکستان نے عراق کے ساتھ اہم مفاہمتی یادداشتوں پر بھی دستخط کرنے سمیت دوطرفہ تعاون کے ضمن میں امکانات کے در وا کرنے کا بھی اعادہ کیا ہے۔
قبل ازیں عراقی نائب وزیر اعظم اور وزیر خارجہ ڈاکٹر فواد حسین کی دعوت پر وزیر خارجہ بلاول بھٹو زرداری تین روزہ سرکاری دورے پر آج بغداد پہنچے، جہاں عراقی نائب وزیر خارجہ محمد حسین بحر العلوم، عراق میں تعینات پاکستانی سفیر احمد امجد علی اور سفارتخانے کے اہل کاروں نے استقبال کیا۔
اپنے دورے کے دوران عراق کی سیاسی قیادت سے ملاقاتوں سمیت وزیر خارجہ بلاول بھٹو نجف اشرف میں نئے پاکستانی سفارت خانے کا سنگ بنیاد رکھنے کے علاوہ زیارات پر بھی جائیں گے۔
