بھارتی میڈیا نے دعویٰ کیا ہے کہ انٹرنیشنل کرکٹ کونسل (آئی سی سی) کے کولمبو میں ہونے والے سالانہ اجلاس میں پاکستان کرکٹ بورڈ نے پاک بھارت دوطرفہ ٹی20 سیریز کے لیے کوئی تجاویز پیش نہیں کیں۔
قبل ازیں، قیاس آرائیاں کی جارہی تھیں کہ پاکستان کرکٹ بورڈ (پی سی بی) کے چیئرمین محسن نقوی نے آئی سی سی اجلاس میں بھارت کو نیوٹرل مقام پر دوطرفہ ٹی20 سیریز کھیلنے کی پیشکش کی ہے۔
یہ بھی پڑھیں: انڈین کرکٹ ٹیم چیمپیئنز ٹرافی کے لیے پاکستان آئے گی، سلطان آف سوئنگ پُر امید کیوں؟
بھارتی نیوز ایجنسی پریس ٹرسٹ آف انڈیا (پی ٹی آئی) نے اپنی رپورٹس میں دعویٰ کیا ہے کہ پاکستان کرکٹ بورڈ ذرائع کا کہنا ہے کہ پی سی بی کا پہلا ہدف آئی سی سی چیمپیئنز ٹرافی کی میزبانی کرنا اور دوسرا ہدف سالانہ اجلاس میں چیمپیئنز ٹرافی کے لیے بجٹ کی منظوری تھا۔
ذرائع کا کہنا تھا کہ پی سی بی چیئرمین میٹنگ میں اپنے 2 بنیادی ایجنڈوں کیساتھ آئے تھے اس لیے دوطرفہ سیریز کی پیشکش کا سوال ہی پیدا نہیں ہوتا۔
یہ بھی پڑھیں: بھارتی کرکٹ ٹیم چیمپیئنز ٹرافی کھیلنے پاکستان نہیں جائے گی، بھارتی میڈیا کا دعویٰ
واضح رہے کہ آئی سی سی کے کولمبو میں منعقدہ 4 روزہ اجلاس میں پاکستان میں شیڈول چیمپیئنز ٹرافی کا بجٹ منظور کیا گیا تھا۔ اجلاس میں کھیل کے مختلف پہلوؤں، نئے قوانین تیار کرنے، ٹی20 ورلڈ کپ سمیت مختلف امور پر گفتگو کی گئی تھی۔
