وزیراعظم محمد شہباز شریف نےچیئر مین نیشنل ڈیزاسٹر مینجمنٹ اتھارٹی کو ملک بھر میں مون سون کی بارشوں سے پیدا ہونے والی صورتحال سے نمٹنے کے لیے تمام ضروری اقدامات کرنے کی ہدایت کردی۔
یہ بھی پڑھیں: ملک بھر میں بارشیں: مختلف حادثات میں 31 افراد جاں بحق، راولپنڈی اسلام آباد میں رین ایمرجنسی نافذ
منگل کو وزیراعظم آفس کےمیڈیا ونگ سے جاری بیان کے مطابق وزیراعظم شہباز شریف نے ٹیلیفون پر این ڈی ایم اے کے چیئرمین لیفٹیننٹ جنرل انعام حیدر ملک کو بارشوں سے ہونے والے جانی و مالی نقصانات کا تخمینہ لگانے، صوبائی ڈیزاسٹر مینجمنٹ ڈیپارٹمنٹس، آزاد کشمیر اسٹیٹ ڈیزاسٹر مینجمنٹ اتھارٹی اور گلگت بلتستان ڈیزاسٹر مینجمنٹ اتھارٹی کے روابط مزید بہتر کرنے اور بارشوں اور لینڈ سلائیڈنگ سے متاثرہ شاہراہوں اور سڑکوں کو بحال کرنے کے حوالے سے تیز تر اقدامات کی ہدایت کی۔
وزیراعظم نے ہدایت کی کہ متاثرہ علاقوں میں علاج معالجے کی تمام تر سہولیات اور امدادی سامان بشمول ادویات اور دیگر اشیائے ضروریہ کی فراہمی یقینی بنائی جائے۔
مزید پڑھیے: کاغان: سیلاب کے باعث بڑی تعداد میں سیاح پھنس گئے، ہوٹل مالکان نے مفت رہائش کی پیشکش کردی
شہباز شریف نے مون سون بارشوں اور اس کے تناظر میں پیدا ہونے والی سیلابی صورتحال کے نتیجے میں ہونے والی اموات پر گہرے دکھ اور افسوس کا اظہار کیا اورجاں بحق ہونے والے افراد کی بلندی درجات کی دعا اور لواحقین سے اظہار تعزیت کیا۔
وزیراعظم نے بارشوں کی وجہ سے حادثات میں زخمی ہونے والوں کو ہر ممکن طبی امداد فراہم کرنے کی بھی ہدایت کی۔
