اسلام آباد کی ضلعی انتظامیہ نے تحریک انصاف کے کل کے جلسے کا اجازت نامہ منسوخ کردیا۔
چیف کمشنر اسلام آباد کی زیر صدارت اجلاس میں ڈسٹرکٹ انٹیلیجنس کمیٹی کی رپورٹ پر غور کے بعد این او سی منسوخ کرنے کا فیصلہ کیا گیا۔
یہ بھی پڑھیں اسلام آباد میں پی ٹی آئی کا جلسہ: کرین تیار، علی امین گنڈا پور خود قافلوں کو لیڈ کریں گے
ضلعی انتظامیہ نے کہاکہ اس وقت بنگلہ دیش کی کرکٹ ٹیم اسلام آباد میں ہے، جس کے باعث شدید سیکیورٹی تحفظات ہیں، چند روز قبل بھی مظاہرین سپریم کورٹ کے باہر پہنچ گئے تھے، اس لیے جلسے کی اجازت نہیں دی جاسکتی۔
واضح رہے کہ پاکستان تحریک انصاف نے 22 اگست کو اسلام آباد میں جلسے کا اعلان کررکھا ہے، اور کہا ہے کہ اگر انتظامیہ نے اجازت نہ بھی تب بھی ہر حال میں جلسہ کریں گے۔
پی ٹی آئی کے سینیئر رہنما شیر افضل مروت یہاں تک کہہ چکے ہیں کہ اسلام آباد جلسہ ہر حال میں ہوگا، اب اگر کوئی نیا 9 مئی ہوتا ہے تو اس کا ذمہ دار میں ہوں گا، عمران خان سے نہ پوچھا جائے۔
یہ بھی پڑھیں پی ٹی آئی نے ترنول جلسہ ملتوی کردیا، نئی تاریخ کیا ہوگی؟
یہ بھی یاد رہے کہ اس سے قبل بھی پی ٹی آئی اسلام آباد میں جلسوں کی تاریخیں دیتی رہی ہے، تاہم انتظامیہ کی جانب سے اجازت نہ ملنے کے بعد قیادت جلسے منسوخ کردیتی تھی، جبکہ عمران خان نے بھی اس سے قبل یہی ہدایات دے رکھی تھیں کہ اسلام آباد میں بغیر اجازت جلسہ نہ کیا جائے۔
