وفاقی وزیر خزانہ محمد اورنگزیب نے کہا ہے کہ آئی ایم ایف قرض پروگرام کی منظوری کے لیے مطمئن ہوگیا ہے، دوست ملکوں کی یقین دہانیوں کے بعد اب عالمی مالیاتی ادارہ ہمیں قسطوں میں رقم فراہم کرے گا، جس کے لیے شرائط پوری کرنا ہوں گی۔
قومی اسمبلی کی قائمہ کمیٹی برائے خزانہ کے اجلاس میں بریفنگ دیتے ہوئے وزیر خزانہ نے کہاکہ دوست ممالک نے آئی ایم ایف کو یقین دہانی کرائی ہے کہ پاکستان کا قرض رول اوور کیا جائے گا۔
یہ بھی پڑھیں آئی ایم ایف کی جانب سے پاکستان کو دیے جانے والے قرض کی توثیق جلد متوقع
انہوں نے کہاکہ دوست ممالک کی یقین دہانیوں کے بعد آئی ایم ایف نے ایگزیکٹو بورڈ کا اجلاس بلا لیا ہے، تاہم ہمیں قرض کی رقم یکمشت نہیں ملے گی، بلکہ قسطوں میں ادائیگی کی جائے گی۔
وزیر خزانہ نے کہاکہ آئی ایم ایف کے ساتھ ہمارا پروگرام 7 ارب ڈالر کا ہے، جبکہ ملک کی مجموعی ضروریات 12 ارب ڈالر کی ہیں، اس لیے ہمیں 5 ارب ڈالر کی اضافی فنانسنگ کی ضرورت ہوگی، تاہم آئی ایم ایف دیگر مالیاتی اداروں سے یہ رقم حاصل کرنے میں مدد فراہم کرےگا۔
یہ بھی پڑھیں آئی ایم ایف کا دباؤ، اسلام آباد کے گھریلو صارفین کے لیے بجلی کی سبسڈی ختم
اجلاس میں وزیر مملکت علی پرویز ملک نے گفتگو کرتے ہوئے کہاکہ آئندہ 4 سال میں ہمیں 100 ارب ڈالر کی ادائیگی کرنی ہے، آئی ایم ایف کی تمام شرائط پوری کریں گے تو قسط جاری ہوگی۔
