ایک 77 سالہ بھارتی ریٹائرڈ شہری کو چیٹ جی پی ٹی کے الرٹ نے اس وقت مزید مالی نقصان سے بچا لیا جب وہ اسٹاک مارکیٹ میں جعلی سرمایہ کاری اسکیم کا شکار ہوا اور اسے 67.10 لاکھ روپے کا نقصان ہوا۔
رپورٹس کے مطابق نومبر 2025 میں متاثرہ شخص سے کچھ افراد نے خود کو آئی آئی ایف ایل ویلتھ مینجمنٹ کے نمائندے ظاہر کیا اور اسے ’پری-IPO الاٹمنٹس میں مدد‘ فراہم کرنے کا وعدہ کیا۔ متاثرہ شخص کو معاہدے پر دستخط کرنے کے بعد 5 لاکھ روپے کی ابتدائی رقم جمع کروانے کے لیے کہا گیا۔
یہ بھی پڑھیں: چیٹ جی پی ٹی صارفین کیا تلاش کرتے ہیں؟ اوپن اے آئی کا بڑا انکشاف
بعد ازاں اسے بتایا گیا کہ اسے ICICI پرڈینشیل AMC کے 150 شیئرز الاٹ کیے گئے ہیں، جس میں 80,000 روپے کا منافع دکھایا گیا۔ متاثرہ شخص مزید سرمایہ کاری کے لیے آمادہ ہو گیا اور 23.10 لاکھ روپے کی سرمایہ کاری کی جس کے بعد اسے 2.24 لاکھ شیئرز 45 روپے فی شیئر کی قیمت پر الاٹ کیے گئے جو اس کی اصل درخواست سے زیادہ تھے۔
جب اس نے اضافی شیئرز کی قیمت ادا کرنے سے قاصر ہونے کا اظہار کیا، تو دھوکہ بازوں نے 36.79 لاکھ روپے کا قرض 13 فیصد سود کی شرح پر پیش کیا، جس کے بدلے میں اسے 42 لاکھ روپے واپس کرنے کا کہا گیا۔ متاثرہ شخص نے اس قرض کی پیشکش قبول کر لی۔
یہ بھی پڑھیں: ’اپنے دوست کو کیسے قتل کروں؟‘، چیٹ جی پی ٹی سے مدد مانگنے پر نوجوان گرفتار
اسی دوران متاثرہ شخص نے چیٹ جی پی ٹی کی مدد سے تحقیقات کیں تو معلوم ہوا کہ یہ ایک جعلی تنظیم ہے اور اس کے خلاف متعدد شکایات موجود ہیں۔
بنگلور سائبر کرائم پولیس اسٹیشن نے کیس درج کرتے ہوئے IT ایکٹ 2000 کی دفعات 66C (شناخت کی چوری) اور 66D (کمپیوٹر وسائل کے ذریعے دھوکہ دہی) اور بھارتیہ نیاۓ سنہیتا کی دفعات 318(4) اور 319(2) کے تحت قانونی کارروائی شروع کر دی ہے اور مزید تحقیقات بھی جاری ہیں۔
