بلوچستان کے دارالحکومت کوئٹہ میں ایم ڈی کیٹ کے امتحان میں نقل کرانے والے افراد کے خلاف مقدمہ درج کرلیا گیا۔
مقدمے میں 3 ملزمان ظفر، احمد اللہ اور ظاہر محمود کو نامزد کیا گیا، جس میں کہا گیا ہے کہ ملزمان سے 6 عدد جدید ڈیوائسز اور 6 ایئر بڈز برآمد ہوئے ہیں۔
یہ بھی پڑھیں ڈیڑھ لاکھ سے زائد طلبا کا ایم ڈی کیٹ امتحان، مراکز کے گرد دفعہ 144 نافذ
ایف آئی آر کے مطابق جدید ڈیوائس پیپر کے دوران نقل کے لیے استعمال ہوتی ہے۔
ایف آئی آر میں درج ہے کہ ملزمان بیوٹمز یونیورسٹی کے قریب برساتی نالے میں طلبہ کو ڈیوائسز اور ایئر بڈز فروخت کررہے تھے۔
ایف آئی آر کے مطابق رش کے باعث سیکیورٹی پر مامور پولیس اہلکاروں نے ملزمان کو ڈیوائسز فروخت کرتے دیکھا۔
ایف آئی آر کے متن میں درج ہے کہ پولیس اہلکاروں کے پہنچنے پر رش میں موجود 2 افراد نے پولیس اہلکاروں کے ساتھ ہاتھا پائی شروع کردی، اور اس دوران ایک سپاہی کی شرٹ پھٹ گئی۔
یہ بھی پڑھیں خیبرپختونخوا میں ایم ڈی کیٹ ٹیسٹ دوبارہ کب ہو گا؟ تاریخ سامنے آ گئی
ایف آئی آر کے مطابق اس دوران 2 ملزمان کو گرفتار کرلیا گیا، جبکہ ان کا ساتھی رش کا فائدہ اٹھاتے ہوئے فرار ہونے میں کامیاب ہوگیا۔
