تحریکِ انصاف نے پنجاب میں عام انتخابات عدالتی افسروں کے ذریعے کرانے کے لیے چیف الیکشن کمشنر کو مراسلہ ارسال کرتے ہوئے عدالتی عملے کی نامزدگی کے حوالے سے لاہور ہائیکورٹ سے رجوع کرنے کی استدعا کی ہے۔
پی ٹی آئی کی جانب سے اظہر صدیق ایڈووکیٹ کے توسط سے چیف الیکشن کمشنر کو ارسال کیے گئے مراسلے میں موقف اختیار کیا گیا ہے کہ شفافیت کے پیش نظر انتخابات ہمیشہ عدالتی افسروں کے ذریعے کرائے جاتے ہیں۔
’انتخابات کےشفاف انعقاد کے لئے عدالتی افسران کی نامزدگیوں نہ ہونے پر تشویش کا شکار ہیں۔ سپریم کورٹ انتخابات کے التوا سے متعلق کیس میں واضح ہدایات دے چکی ہے۔ آئین کے آرٹیکل 213, 218 اور 220 بھی اس حوالے سے واضح ہدایات فراہم کرتے ہیں۔‘
تحریک انصاف کے مطابق الیکشن کمیشن بھی غیر جانبدار رہتے ہوئے عدالتی عملے کے لیے لاہور ہائیکورٹ سے رجوع کرے کیونکہ عدالتی افسروں کی بجائے حکومتی ماتحت افسروں کو انتخابات کے انعقاد کی ذمہ داری سونپنے کی صورت میں انتخابات کی شفافیت پر سوال اٹھیں گے۔
’شفاف انتخابات کا انعقاد نہ ہونے سے عدلیہ پر مقدمات کے بوجھ میں مزید اضافہ ہوگا۔ دھاندلی کے خاتمے اور آزادانہ انتخابات کے انعقاد کیلئے عدلیہ کا کردار نہایت اہمیت کا حامل ہے۔‘
