حکومت پنجاب صوبہ میں سیاحت کے فروغ کے لیے مختلف اقدامات کررہی ہے جن میں راولپنڈی سے مری تک گلاس ٹرین اور لاہور میں ماڈرن ٹرام سروس کا منصوبہ قابل ذکر ہیں۔ تاہم، ان منصوبوں کی تکمیل سے قبل لاہور میں ہائبرڈ ڈبل ڈیکر بسوں کا افتتاح کردیا گیا ہے۔
یہ بھی پڑھیں: لاہور میں ٹرام سروس کا منصوبہ، ٹرین کب سے چلے گی اور روٹ کیا ہوگا؟
وزیراعلیٰ پنجاب مریم نواز شریف نے آج لاہور میں نے 5 نئی ہائبرڈ ڈبل ڈیکر بسوں کا باضابطہ افتتاح کیا، انہوں نے ہائبرڈ ڈبل ڈیکر بس کا معائنہ کیا اور اس میں سفر کیا۔ لاہور میں سیاحت کے لیے نئے روٹس پر 5 نئی ہائبرڈ ڈبل ڈیکر بسیں چلائی جائیں گی۔ بہاولپور اور راولپنڈی میں بھی ایک ایک ڈبل ڈیکر بس کا اضافہ کیا جائے گا، ملتان اور فیصل آباد میں بھی سیاحت کے لیے ڈبل ڈیکر بس سروس شروع ہوگی۔
وزیراعلیٰ مریم نواز شریف کو ہائبرڈ ڈبل ڈیکر بس سے متعلق بریفنگ میں بتایا گیا کہ ٹی ڈی سی پی کے تحت ڈبل ڈیکر بس سروس کا آغاز نومبر 2015 میں سابق وزیراعلیٰ پنجاب شہباز شریف کے دور میں ہوا، سیاحتی بسوں میں اکیڈیمیا، سفارتکار، سرکاری مہمان، کارپوریٹ سیکٹر، شوبز سے تعلق رکھنے والی شخصیات کے علاوہ عام عوام بھی سیاحتی مقامات کی سیر کرتے ہیں۔
لاہور میں 3 نئی سیاحتی بسوں کا روٹ قذافی اسٹیڈیم سے مختلف سیاحتی مقامات تک ہوگا، پنجاب بھر میں میٹروپولیٹن ٹورازم کے لیے مزید نئی، جدید اور ماحول دوست بسیں فراہم کریں گے۔ اس موقع پر سینیٹر پرویز رشید، سینیئر صوبائی وزیر مریم اورنگزیب، وزیر اطلاعات و ثقافت عظمیٰ زاہد بخاری، معاون خصوصی راشد نصراللہ، ایم پی اے ثانیہ عاشق، چیف سیکریٹری اور دیگر حکام بھی موجود تھے۔
