مبینہ طور پر فریئر ہال سے چوری ہونے والی پینٹنگز جو کچھ ہفتے قبل مشہور ڈرامے ’کبھی میں، کبھی تم‘ میں نظر آئی تھیں، وہ حقیقی آرٹسٹ اور مالک صفدر علی المعروف سیفی سومرو کے حوالے کردی گئی ہیں۔
رواں ماہ ستمبر کے وسط میں ضلع گھوٹکی کے شہر ڈہرکی سے تعلق رکھنے والے نوجوان آرٹسٹ صفدر علی المعروف سیفی سومرو نے دعویٰ کیا تھا کہ ڈرامے ’کبھی میں، کبھی تم‘ کے ایک سین میں ان کی 7 سال قبل چوری ہونے والی پینٹگنز دکھائی گئی ہیں۔
انہوں نے دعویٰ کیا تھا کہ ڈرامے کے کرداروں ’عدیل اور نتاشا‘ پر فلمائے گئے ایک منظر میں ان کی چوری شدہ پینٹنگز دکھائی گئیں جو انہوں نے فریئر ہال میں نمائش کے دوران رکھی تھیں، جہاں کی انتظامیہ نے انہیں ماضی میں بتایا تھا کہ مذکورہ پینٹنگز چوری ہوگئیں۔
مزید پڑھیں:’مصور سیفی سومرو کی پینٹنگز فریئر ہال میں موجود، چوری نہیں ہوئیں‘
صفدر علی نے 2017 میں کراچی میں ہونے والی نمائش میں کراچی کے فریئر ہال میں جمع کرائے تھے، جسے انہوں نے ’انوسینٹ فیسز‘ (معصوم چہروں) کا نام دیا تھا۔ اس نمائش کے ضوابط کے مطابق اگر فن پارے بِک جاتے ہیں تو اس کی رقم مصور کو ادا کی جاتی اور نہ بِکنے کی صورت میں فن پارے مصور کے حوالے سے کردیے جاتے ہیں۔
تاہم اس نمائش سے متعلق صفدر علی کو بتایا گیا تھا کہ ان کے فن پارے فروخت نہیں ہوئے، اس پر مصور نے نمائش آرگنائزرز سے فن پارے واپس کرنے کا مطالبہ کیا، جس پر ایک ماہ بعد بذریعہ فون جواب دیتے ہوئے بتایا گیا کہ ان کی پینٹنگز گُم ہو چکی ہیں۔ پینٹنگز ڈرامے میں نظر آئیں تو انہوں نے سوشل میڈیا پر آواز اٹھائی، جس کے بعد محکمہ ثقافت سندھ نے معاملے کی تفتیش کے لیے کمیٹی قائم کی تھی۔
مزید پڑھیں:مصور صفدر علی کی ’گم شدہ‘ پینٹنگز کی یوٹیوب پر ڈرامائی بازیافت
تفتیشی کمیٹی نے دعویٰ کیا تھا کہ سیفی سومرو کی پینٹنگز چوری نہیں ہوئیں بلکہ وہ اب بھی فیریئر ہال میں موجود ہیں لیکن نمائش کے لیے پینٹنگز کو ایک سے دوسری جگہ منتقل کیا جاتا رہا، جس بنا پر کنفیوژن ہوئی کہ پینٹنگز چوری ہوئی ہیں۔ فیریئر ہال انتظامیہ نے مذکورہ پینٹنگز حقیقی آرٹسٹ مالک کو دے دیں اور انہوں نے اپنی فیس بک ویڈیو میں پینٹنگز ملنے کی تصدیق بھی کی۔
ویڈیو میں سیفی سومرو نے بتایا کہ انہیں پہلے ہی 30 ستمبر کو آکر اپنی پینٹنگز لے جانے کا کہا گیا تھا اور اب انہوں نے اپنے فن پارے کئی سال بعد واپس لے لیے۔ انہوں نے مطالبہ کیا کہ گزشتہ 7 سال کے دوران ان کی پینٹنگز کو مختلف نمائشوں اور ڈراموں میں دکھا کر کروڑوں روپے کمائے گئے، انہیں بھی رائلٹی دی جائے۔
