امریکی صدر جوبائیڈن نے اسرائیل پر حملے کی پاداش میں ایران کو مزید پابندیوں کی دھمکی دے دی۔
غیرملکی میڈیا رپورٹس کے مطابق امریکی صدر جوبائیڈن نے کہا ہے کہ ایران پر کچھ مزید پابندیاں عائد ہونے والی ہیں۔
یہ بھی پڑھیں مشرق وسطیٰ کی کشیدہ صورت حال پر اقوام متحدہ کی سیکیورٹی کونسل کا ہنگامی اجلاس شروع
انہوں نے کہاکہ امریکا ایران کی جوہری تنصیبات پر حملے کی حمایت نہیں کرتا، بہت جلد اسرائیلی وزیراعظم نیتن یاہو سے بات کروں گا۔
جوبائیڈن نے کہاکہ جی سیون رہنماؤں کا اجلاس طلب کیا ہے جس میں اہم معاملات پر بات ہوگی۔
واضح رہے کہ ایران نے گزشتہ رات اسرائیل پر میزائل حملے کیے تھے، جس کے بعد اسرائیل نے کہا ہے کہ ایران کو اس کی بھاری قیمت چکانا پڑے گی، ہم ایران پر مضبوط حملہ کریں گے۔
اسرائیل کی جانب سے دی گئی دھمکی کے بعد ایران نے کہا تھا کہ اب اگر اسرائیل نے کوئی کارروائی کی تو جوابی حملہ کرتے ہوئے اس کے انفراسٹرکچر کو نشانہ بنایا جائے گا۔
یاد رہے کہ گزشتہ برس 7 اکتوبر کو فلسطین کی مزاحمتی تنظیم حماس کی جانب سے کیے گئے ایک آپریشن کے بعد اسرائیل اور حماس کی جنگ جاری ہے، جبکہ اب یہ لڑائی پورے مشرق وسطیٰ میں پھیل رہی ہے۔
یہ بھی پڑھیں پاکستان کا فریقین پر مشرق وسطیٰ میں جنگ کے خاتمے پر زور،اقوام متحدہ سے بھی کردار نبھانے کا مطالبہ
اسرائیل نے غزہ کے بعد اب لڑائی کا رخ لبنان کی طرف موڑ دیا ہے، اور پے درپے حملے کیے جارہے ہیں۔
