اسرائیلی وزیر اعظم نیتن یاہو نے لبنانی حکومت و عوام کو دھمکی دیتے ہوئے کہا کہ وہ حزب اللہ کو نکال باہر کریں اور اس طرح کی تباہی اور مصائب سے بچیں جو اس وقت غزہ میں دکھائی دے رہے ہیں۔ اپنے ملک کو حزب اللہ سے آزاد کریں تاکہ یہ جنگ ختم ہوجائے۔
غیرملکی میڈیا رپورٹس کے مطابق اسرائیلی وزیر اعظم بینجمن نیتن یاہو کا دھمکی آمیز یہ بیان اس وقت سامنے آیا جب اسرائیل نے جنوب مغربی لبنان کے ایک نئے زون میں ہزاروں مزید فوجی بھیج کر حزب اللہ کے خلاف اپنے حملے کو بڑھا دیا ہے۔ پیر کے روز فضائی حملوں میں بھی حزب اللہ کے 50 ارکان مارے گئے تھے۔
مزید پڑھیں: اسرائیلی وزیر اعظم نیتن یاہو کی جنگی مہم سے وزیر دفاع یوآو گیلنٹ مایوس کیوں؟
لبنان کی وزارت صحت نے کہا کہ گزشتہ 24 گھنٹوں کے دوران اسرائیلی حملوں میں 36 افراد ہلاک اور 150 زخمی ہوئے ہیں۔ ادھر حزب اللہ نے مسلسل تیسرے روز اسرائیلی بندرگاہ حیفہ پر راکٹ حملوں سے 12 افراد زخمی ہوگئے۔
لبنان کے عوام کے نام ایک ویڈیو خطاب کے دوران نیتن یاہو نے کہا کہ آپ کے پاس لبنان کو بچانے کا موقع ہے اس سے پہلے کہ وہ ایک طویل جنگ کی کھائی میں گر جائے جو تباہی اور مصائب کا باعث بنے گی جیسا کہ ہم غزہ میں دیکھ رہے ہیں۔
’میں آپ سے کہتا ہوں، لبنان کے لوگو! اپنے ملک کو حزب اللہ سے آزاد کرو تاکہ یہ جنگ ختم ہو جائے‘۔
یہ بھی پڑھیں: حزب اللہ نے اسرائیل پر 100 سے زیادہ راکٹ داغ دیے، 12 اسرائیلی زخمی
نیتن یاہو نے یہ بھی دعویٰ کیا کہ اسرائیل کی دفاعی فورسز نے حزب اللہ کے سابق رہنما حسن نصر اللہ کے جانشین کو ہلاک کردیا ہے، لیکن اسرائیلی ڈیفنس فورسز (آئی ڈی ایف) نے بعد میں کہا کہ وہ ہاشم صفی الدین کی موت کی تصدیق نہیں کرسکتے۔
واضح رہے حزب اللہ 3ہفتوں کے شدید اسرائیلی حملوں اور دیگر حملوں کے باوجود منحرف رہی ہے جس کے بارے میں لبنانی حکام کا کہنا ہے کہ 1,400 سے زیادہ افراد ہلاک اور 12لاکھ افراد بے گھر ہوئے ہیں۔
