عوامی نیشنل پارٹی (اے این پی) کے مرکزی صدر و سینیٹر ایمل ولی خان نے کہا ہے کہ 26 آئینی ترمیم نے سابق چیف جسٹس ثاقب نثار، جسٹس کھوسہ اور ان جیسے دیگر ججز کا راستہ روک دیا ہے۔
یہ بھی پڑھیں: آئینی ترمیم جتنی جلدی ہوجائے اتنا بہتر ہے، ایمل ولی خان
سینیٹ کے اجلاس میں اظہار خیال کرتے ہوئے اے این پی کے سینیٹر ایمل ولی خان نے کہا کہ ہر کمیٹی میں، میں نے یہ رائے دی تھی کہ پی ٹی آئی اس قانون سازی میں دلچسپی نہیں رکھتی، آج علی ظفر کہتے ہیں کہ ہم حصہ نہیں، لیکن یہ بھی کمیٹی میں 10 منٹ کی تقریر کرتے تھے، عمر ایوب بھی اس کمیٹی ہوتے تھے۔
‘اب بانی چیئرمین ختم’
ایمل ولی خان نے کہا کہ پی ٹی آئی پارٹی نہیں سنگل پرسن ہے، اس آئینی ترمیم میں پی ٹی آئی نے مخالفت کرنا ہی تھی، اگر کلمہ بھی ہوتا اس ترمیم میں تو یہ اس کی بھی مخالفت کرتے کیونکہ یہ ن لیگ لے کر آرہی ہے۔
یہ بھی پڑھیں: میں ابن غدار، ابن غدار، ابن غدار کا بیٹا ہوں، ایمل ولی خان
انہوں نے پی ٹی آئی پر تنقید کرتے ہوئے کہا کہ اب بانی چیئرمین ختم، وہ قید ہے، اب آگے چلو۔
ان کا کہنا تھا کہ ہم نے آئینی ترمیم کے ذریعے ثاقب نثار، جسٹس کھوسہ اور ان جیسے دیگر ججز کے آنے کا راستہ روک دیا ہے، ساسو ماں کے فیصلے ہوتے تھے، لاہوری فیصلے ہوتے تھے،اب ایسے فیصلے اور ایسے لوگ سامنے نہیں آئیں گے۔
یہ بھی پڑھیں: 26 ویں آئینی ترمیم کا بل وفاقی کابینہ کی منظوری کے بعد سینیٹ میں پیش
انہوں نے سوال اٹھایا کہ اگر حکومت کو ججز کی تعیناتی کا اختیار نہیں دینا تو اور کس کو دیں؟ سینیٹ کے کلاس 4 کے کسی کو دے دیں، ہم نے 26 ترامیم پر اتفاق کیا تھا، لیکن حکومت نے 22 ترمیم پیش کی، اس وقت بھی 4 ترمیم اس مسودے میں شامل نہیں ہے۔
’ہم ایک بانی کو بند کر کے پورا ملک چلائیں گے‘
ایمل ولی خان نے کہا کہ فوجی تنصیبات پر جو بھی حملہ کرتا ہے اس کے خلاف سخت ایکشن لینا ہوگا، پی ٹی آئی چاہتی ہے کہ ملک بند ہو، لیکن ہم ایک بانی کو بند کر کے پورا ملک چلائیں گے۔
