چیئرمین پیپلز پارٹی بلاول بھٹو زرداری نے بیگم نصرت بھٹو کی جمہوریت سے بے لوث وابستگی کو خراج عقیدت پیش کرتے ہوئے انہیں جمہوریت کی خاطر سب کچھ قربان کرنے کی علامت قرار دیا ہے۔
بیگم نصرت بھٹو کی 13 ویں برسی کے موقع پر جاری کیے گئے پیغام میں بلاول بھٹو زرداری نے مادرِ جمہوریت بیگم نصرت بھٹو کو خراجِ عقیدت کرتے ہوئے کہا ہے کہ بیگم بھٹو کی جمہوریت، انصاف اور مساوات کی جدوجہد میں خدمات غیر معمولی اور قربانیاں بے مثال ہیں۔
یہ بھی پڑھیں: بیگم نصرت بھٹو جمہوریت پسندوں کے لیے ہمت، عزم اور استقلال کا منارہِ نور تھیں: بلاول بھٹو
بلاول بھٹو زرداری نے بیگم نصرت بھٹو کی جمہوریت کے مقصد سے بے لوث وابستگی پر انہیں سلام پیش کرتے ہوئے کہا کہ مسلسل چیلنجز کے باوجود ان کی عزم و ہمت ان کی غیر معمولی میراث کا ثبوت ہے۔
چیئرمین پیپلز پارٹی کے مطابق مادرِ جمہوریت کی یاد پارٹی اور قوم دونوں کے لیے اُمید، قوت اور رہنمائی کی علامت بنی رہے گی، ان کے تذکرے کے بغیر پاکستان کی سیاسی جدوجہد کی تاریخ نامکمل رہے گی۔
مزید پڑھیں:بلاول بھٹو زرداری 35 برس کے ہو گئے، ان کی زندگی پر ایک نظر!
بلاول بھٹو زرداری کا کہنا ہے کہ مادرِ جمہوریت بیگم نصرت بھٹو کی شخصیت کے اثرات سیاست سے کہیں آگے مرتب ہوئے ہیں، انہوں نے بیگم نصرت بھٹو کو آمریت اور جبر کے خلاف مزاحمت کی غیرمعمولی علامت اور استعارے سے تعبیر بھی کیا۔
