وزیراعلیٰ خیبر پختونخوا سردار علی امین خان گنڈاپور جمعہ کے دن پبلک ڈے منسوخ کرکے کارکنان کو ہدایت کی ہے کہ وہ وفاقی حکومت کے خلاف جلسے کی تیاری کریں۔
وزیرا علیٰ ہاؤس سے کارکنان اور عوام کے نام جاری ایک مختصر پیغام میں علی امین گنڈاپور نے کہا ہے کہ جمعہ کا دن پبلک ڈے ہوتا ہے، وہ اس جمعہ کو نہیں ہے، اگلے جمعہ ملاقات کے لیے ہوگی۔
‘آپ سب کو آگاہ کیا جاتا ہے کہ سی ایم ہاؤس پشاور آنے کی زحمت نہ کریں اور جلسے کے لیے تیاری کریں۔ شکریہ’
دوسری طرف وزیر اعلیٰ علی امین گنڈاپور نے آج پشاور میں ایک مختصر میڈیا ٹاک میں 26 ویں آئینی ترمیم کو وفاقی حکومت کی من پسند ترمیم قرار دیا اور کہا کہ پی ٹی آئی اس کے خلاف بھر پور احتجاج کرے گی۔
‘اس بار ہم پورے پاکستان کو بند کریں گے۔ یہ حکومت من پسند ترمیم کر رہی ہے، آئین کو بھی بار بار توڑ رہی ہے تو اس کے لیے مکمل بندوبست کیا ہے۔’
قائدین اور کارکنان کو تیاری کرنے کی ہدایت، احتجاج کب ہوگا؟
پی ٹی آئی ذرائع نے بتایا کہ وزیر اعلیٰ علی امین گنڈاپور نے پارٹی قائدین اور کارکنان کو 26 ویں آئینی ترمیم کے خلاف احتجاج کے لیے تیاری کرنے کی ہدایت کی ہے۔ انہوں نے بتایا کہ وزیر اعلیٰ عمران خان سے جیل میں ملاقات کریں گے، احتجاج کے حوالے سے آگاہ کریں گے اور عمران خان کی ہدایت پر تاریخ کا اعلان کریں گے۔
ذرائع نے بتایا کہ پارٹی قیادت نے علی امین گنڈاپور کو مشورہ دیا ہے کہ اسلام آباد میں احتجاج یا دھرنے کے لیے کارکنان کو نکالنا مشکل ہوگا۔ انھوں نے بڑے شہروں اور اضلاع میں ضلعی قیادت کی نگرانی میں احتجاج کرنے کا مشورہ دیا ہے۔ اس تناظر میں علی امین گنڈاپور عمران خان کو صورت حال سے آگاہ کریں گے۔
ذرائع نے بتایا کہ وزیر اعلیٰ احتجاج کے لیے تیاریوں کے حوالے سے پارٹی قیادت سے رابطے میں ہیں۔ پورے پاکستان میں بھرپور احتجاج کے لیے انتظامات اور کارکنان کو زیادہ سے زیادہ نکلنے کی ہدایت کر رہے ہیں۔
