وفاقی وزیر توانائی اویس لغاری نے کہا ہے کہ ٹاسک فورس پاور سیکٹر میں مختلف اصلاحات کے ذریعے ملک کی اقتصادی ترقی اور عوام کی بہتری کے لیے جامع اقدامات کر رہی ہے۔ پاور سیکٹر کا گردشی قرضہ 9.5 ارب ڈالر تک پہنچنے کی وجہ سے یہ اصلاحات ناگزیر ہیں۔
وزیر توانائی نے مزید کہا کہ اصلاحات کا مقصد بجلی کی قیمتوں میں کمی، بجلی کی دستیابی کو بہتر بنانا اور ایک مستحکم مسابقتی پاور مارکیٹ کا قیام ہے۔ حکومت نے بجلی کی قیمتوں میں کمی کے لیے کچھ آئی پی پیز کے ساتھ معاہدوں کی جانچ پڑتال اور کچھ کے ساتھ پرانے کنٹریکٹ ختم بھی کیے ہیں۔
مزید پڑھیں:چند ہفتوں میں پاور سیکٹر سے اچھی خبریں ملیں گی، اویس لغاری
ان کا کہنا تھا کہ ان اقدامات سے نہ صرف بجلی کی قیمتوں میں کمی بلکہ حکومت کی اخراجات میں بھی کمی آئےگی۔ ایک نئی پاور مارکیٹ کا ڈھانچہ متعارف کرایا جائے گا جہاں صارفین بجلی خرید سکیں گے۔ نئی پاور مارکیٹ میں صارفین مختلف کمپنیوں کی پیش کردہ بجلی کے پیکجز میں سے انتخاب کرسکیں گے۔
نیشنل ٹاسک فورس کی بہترین حکمت عملی کے باعث پاور سیکٹر میں جامع اصلاحات کا عمل جاری ہے۔ وزیر اعظم پاکستان کے احکامات کی روشنی میں پاور سیکٹر میں اصلاحات کے لیے نیشنل ٹاسک فورس کا قیام عمل میں لایا گیا تھا۔ ٹاسک فورس میں چیئرمین وزیر توانائی اویس لغاری کے علاوہ آرمی آفیشلز اور دیگر اداروں کی نمائندگی بھی شامل ہے۔
