وزیراعلیٰ پنجاب مریم نواز نے نوازشریف کینسر اسپتال کا سنگ بنیاد رکھ دیا۔ اس موقع پر وزیر اعلیٰ پنجاب مریم نواز نے کہا کہ آج ہمارا ایک اور خواب پورا ہونے جا رہا ہے، پورے پاکستان میں کسی بھی حکومت کا یہ پہلا کینسر اسپتال ہے، یہاں پر کسی مریض کو انکار نہیں ہوگا۔
وزیراعلیٰ مریم نواز نے کینسر اسپتال کے سنگ بنیاد کی تقریب سے خطاب کرتے ہوئے کہا کہ یہ محض ایک عمارت کا سنگ بنیاد نہیں، لاکھوں زندگیوں کا دیا ہے، نوازشریف کینسر اسپتال صرف پنجاب نہیں پورے پاکستان کے لیے ہے، نواز شریف کینسر اسپتال 920بیڈز پر مشتمل ہوگا۔
مزید پڑھیں: مریم نواز نے اسموگ کے خاتمے کے لیے بھارت کے ساتھ سفارتکاری کا عندیہ دے دیا
وزیراعلیٰ پنجاب کا کہنا تھا کہ پنجاب نے اپنے وسائل کے دروازے باقی صوبوں کے لیے کھولے ہوئے ہیں، کینسر کا علاج کافی مہنگا ہے، نوازشریف کینسر اسپتال اربوں روپے کا منصوبہ ہے، کینسر اسپتال تقریباً 55ارب روپے کا منصوبہ ہے۔
انہوں نے کہا کہ اگر صوبے کے عوام کینسر سے مر رہے ہوں اور پیسے اسپتال پر نہ لگائے جائیں تو پیسے کا کیا فائدہ، فلاحی ریاست ماں کی طرح ہوتی ہے، جن کوعوام کی خدمت کرنے کی توفیق نہیں ہوئی وہ لوگ سوال کرتے ہیں۔ یہ سوال پوچھتے ہیں کہ اس کا نام نوازشریف کے نام پر کیوں رکھا گیا ہے۔
’پیسہ تو ہر حکومت کے پاس ہوتا ہے، پیسہ تو ہر وزیراعلیٰ کے پاس ہے کسی اور وزیراعلیٰ نے یہ تکلیف کیوں نہیں کی، نواز شریف، شہباز شریف اور میری ترجیح عوام کی خدمت ہے‘۔
یہ بھی پڑھیں: مریم نواز کی جانب سے خواتین میں ملازمت کے لیٹرز کی تقسیم
وزیراعلیٰ مریم نواز کا مزید کہنا تھا کہ جہاں نواز شریف کا نام آتا ہے لوگ آنکھیں بند کرکے اعتبار کرتے ہیں، یہ کینسر اسپتال اپنی طرز کا پہلا اسپتال ہے، 7ماہ کے اندر اسپتال کی کنسٹرکشن شروع ہوچکی ہے۔ کینسر اسپتال کو 2فیز میں مکمل کیا جائے گا۔
انہوں نے بتایا کہ پہلا فیز 2025 اور دوسرا 2027میں مکمل ہونا ہے، ہدایات دی ہیں کہ 12ماہ کے اندر پہلا فیز فنکشنل کرکے دیں، کینسر کے آخری اسٹیج کے مریض کو بھی یہاں رکھا جائے گا۔ اسپتال کے اندر لواحقین کی رہائش کے لیے بھی بلڈنگ بنائی جائے گی۔
