پاکستان تحریک انصاف کے مرکزی رہنما شیر افضل مروت نے کہا ہے کہ بشریٰ بی بی 24 نومبر کو اسلام آباد میں ہونے والے احتجاج میں شرکت نہیں کریں گی۔ یہ احتجاج ماضی کے احتجاج سے مختلف ہوگا اور نتیجہ خیز ہوگا۔ اس احتجاج میں ماضی کے برعکس خیبرپختونخوا کے علاوہ ملک بھر سے بڑے قافلے شرکت کریں گے۔ پنجاب اور سندھ سے بھی قافلے اسلام آباد کا رخ کریں گے۔ تمام قیادت، اراکین پارلیمنٹ، تمام تنظیمیں موجود ہوں گی، عمران خان کی رہائی تک دھرنا جاری رہے گا۔
وی ایکسکلوسیو میں گفتگو کرتے ہوئے پاکستان تحریک انصاف کے رہنما شیر افضل مروت نے کہا کہ ماضی میں جو بھی احتجاج ہوئے ہیں ان کا کوئی نتیجہ نہیں آیا تاہم 24 نومبر کا احتجاج فیصلہ کن ہوگا۔ اور جب تک عمران خان کی رہائی نہیں ہو جاتی یہ احتجاج جاری رہے گا۔ اس احتجاج میں شرکت کے لیے ملک بھر سے لوگ اسلام اباد پہنچیں گے۔ ہر قافلہ دوسرے سے بڑا ہوگا۔ امید ہے کہ زیادہ سے زیادہ لوگوں کو یہاں پہنچانے میں کامیاب ہوجائیں گے۔
شیر افضل مروت نے کہا کہ کسی بھی لیول پر کسی سے کوئی رابطہ بھی نہیں ہوا۔ یہ صرف جیو ٹی وی چینل ایسی خبریں چلا رہا ہے کہ ڈیل ہو رہی ہے۔ جس کا مقصد صرف یہ ہے کہ جو احتجاج کا مومنٹم بنا ہوا ہے اسے توڑا جا سکے۔ ہمارے سیکرٹری اطلاعات وضاحت کر چکے ہیں کہ کسی بھی سطح پر کوئی بھی ڈیل یا مذاکرات نہیں ہورہے ہیں۔ تمام قیادت متفق ہے کہ ہم نے احتجاج کرنا ہے۔
پی ٹی آئی رہنما نے کہا کہ عمران خان کو جن مقدمات میں قید کیا گیا تھا وہ تمام کے تمام جھوٹے تھے اور ان مقدمات سے عمران خان کو بری کیا جا چکا ہے۔ عمران خان کو کیوں اتنا عرصہ قید میں رکھا گیا ہے اس کی تلافی کون کرے گا؟ لیکن عمران خان کی قید نے پی ٹی آئی کو کمال عظمت سے نواز دیا ہے۔
شیر افضل مروت نے کہا کہ بشریٰ بی بی نے صرف پیغام رسانی کا کام کیا ہے، اس کے علاوہ وہ عملی طور پر سیاست میں شامل نہیں ہوئی ہیں۔ چونکہ عمران خان سے جیل میں کسی اور کی ملاقات نہیں ہوئی تھی، بشریٰ بی بی نے بطور عمران خان کی بیوی جیل میں ملاقات کی اور جو پیغام دیا گیا اسے سب تک پہنچایا۔
انہوں نے کہا کہ مجھے بھی 10 ہزار بندے لانے کا پیغام ملا ہے۔ عمران خان کی رہائی تک دھرنا جاری رہے گا، ہمارے پاس اس کے علاوہ کوئی اور آپشن نہیں ہے۔
شیر افضل مروت نے کہا کہ میرا نہیں خیال کہ بشریٰ بی بی 24 نومبر کے احتجاج میں شرکت کریں گی۔ جتنا مجھے پی ٹی آئی کی سیاست کا اندازہ ہے اس بنیاد پر میں کہہ سکتا ہوں کہ وہ احتجاج میں شرکت کے لیے اسلام آباد نہیں آئیں گی۔
بشریٰ بی بی کے پارٹی کو چلانے کے سوال پر شیر افضل مروت نے کہا کہ ایسا نہیں ہے۔ اس وقت پارٹی کی تمام قیادت موجود ہے اور سب لوگ 24 نومبر کے احتجاج کی تیاری کر رہے ہیں۔ تمام قیادت شامل ہوگی۔ ایسا نہیں ہوگا کہ پانچ لوگ ہر دفعہ ماریں کھائیں اور احتجاج میں آگے رہیں جبکہ کچھ لوگ لیڈر بن جائیں اور ایک دفعہ بھی مار نہ کھائیں۔ یہ نہیں ہو سکتا۔ اب تمام لوگ احتجاج میں شامل ہوں گے۔
