پاکستان نے آئی ٹی ایف ماسٹرز ورلڈ ٹیم چیمپیئن شپ میں اب تک کی بہترین کارکردگی کا مظاہرہ کرتے ہوئے 45 پلس کیٹیگری میں سلور میڈل حاصل کرلیا۔
چیمپیئن شپ کے فائنل میں پاکستان کو ٹاپ سیڈ اور ٹورنامنٹ کی فیورٹ ٹیم اسپین کے ہاتھوں سخت مقابلے کے بعد 2-1 سے شکست کا سامنا کرنا پڑا۔
مزید پڑھیں: ہاکی ٹیسٹ سیریز: جنوبی کوریا کی آخری میچ میں پاکستان کو 2 کے مقابلے میں 6 گول سے شکست
فیصلہ کن مقابلہ دوسرے سنگلز میں ہوا، جہاں پاکستان کے عقیل خان کو اسپین کے فرانسسکو جیویئر مارٹینیز بینا نے 6-4، 6-2 سے شکست دی۔ دونوں کھلاڑی ٹورنامنٹ کے نمایاں ترین کھلاڑیوں میں شمار کیے جا رہے تھے۔
عقیل خان نے ٹورنامنٹ کے دوران غیر معمولی کارکردگی کا مظاہرہ کیا اور سنگلز کے ساتھ ساتھ سابق ڈیوس کپ کھلاڑی اعصام الحق قریشی کے ساتھ ڈبلز میں بھی کئی شاندار فتوحات حاصل کیں۔
تاہم مسلسل کئی روز تک جسمانی طور پر تھکا دینے والے اور انتہائی سخت مقابلوں کے بعد فیصلہ کن میچ میں تھکن بھی ایک عنصر ثابت ہوئی، جبکہ اسپین کی ٹیم تازہ دم اور مضبوط حریف کے طور پر میدان میں اتری۔
امریکا، کینیڈا اور پرتگال سمیت اہم ٹیموں کو شکست
پاکستان کا فائنل تک سفر اہم کامیابیوں سے عبارت رہا۔ قومی ٹیم نے امریکا، کینیڈا، میزبان پرتگال اور سویڈن کے خلاف نمایاں فتوحات حاصل کیں، جس کے نتیجے میں پاکستان نے چیمپئن شپ کے پوڈیم پر جگہ بنائی۔
پرتگال کے جیمور ٹینس سینٹر میں ہونے والی میڈل تقریب میں ٹینس کے اعلیٰ حکام نے شرکت کی، جہاں پاکستان کو سلور میڈلز اور رنر اپ ٹرافی انٹرنیشنل ٹینس فیڈریشن کے صدر اور پرتگالی ٹینس فیڈریشن کے صدر نے پیش کی۔
تقریب میں پاکستان میں پرتگال کے سفیر پاؤلو ڈومنگیز بھی موجود تھے۔ پاکستانی ٹیم نے پرتگال میں قیام کے دوران ان کی حمایت اور حوصلہ افزائی پر اظہار تشکر کیا۔
پاکستان واحد ایشیائی میڈل جیتنے والا ملک
چیمپیئن شپ میں 30 سے زیادہ ممالک کی ٹیموں اور 300 سے زیادہ کھلاڑیوں نے شرکت کی، تاہم پاکستان واحد ایشیائی ملک رہا جس نے میڈل جیتا۔
پاکستان کی اس کامیابی نے بین الاقوامی ماسٹرز ٹینس سرکٹ میں پاکستانی کھلاڑیوں کی بڑھتی ہوئی موجودگی کو نمایاں کیا ہے۔
میڈل تقریب کے بعد اعصام الحق قریشی نے ٹورنامنٹ کے دوران اپنے ساتھی کھلاڑیوں کی عزم اور پیشہ ورانہ انداز میں کارکردگی کو سراہا۔
اعصام الحق قریشی نے کہاکہ پاکستان ٹینس کے لیے یہ ہفتہ ناقابل فراموش رہا۔ انہوں نے عقیل خان، شہریار سلامات اور ہادی حسین کو عزم، پیشہ ورانہ رویے اور ٹیم ورک پر مبارکباد دی۔
اسپانسرز اور میڈیا کا بھی شکریہ
اعصام الحق قریشی نے پاکستان کی شرکت کو ممکن بنانے میں تعاون کرنے والے ٹیم کے اسپانسرز، لاما ریٹیل، سِکاس اسکولز، ٹیبل ویلیکس اور فیضان اسٹیل کا بھی شکریہ ادا کیا۔
انہوں نے پاکستانی میڈیا کا بھی شکریہ ادا کیا جس نے ٹورنامنٹ کی کوریج کی، جس میں میچ رپورٹس، تصاویر اور ویڈیو اپ ڈیٹس باقاعدگی سے شامل رہیں۔
اعصام الحق نے پاکستان اور بیرون ملک موجود شائقین اور حامیوں کا بھی ان کی حوصلہ افزائی پر شکریہ ادا کیا۔
انہوں نے پرتگال کے سفیر پاؤلو ڈومنگیز کا اختتامی تقریب میں شرکت اور پرتگال میں ٹیم کے قیام کے دوران حمایت کرنے پر خصوصی طور پر شکریہ ادا کیا۔
اعصام الحق قریشی نے کہاکہ اس طرح کے اقدامات دونوں ممالک کے درمیان دوستی کو مضبوط بناتے ہیں اور پاکستانی ٹیم کے لیے ان کی خاص اہمیت ہے۔
مزید پڑھیں: پاکستانی اسپنر نعمان علی لنکا شائر کا حصہ بن گئے، کاؤنٹی چیمپیئن شپ میں ایکشن میں نظر آئیں گے
آئی ٹی ایف ماسٹرز ورلڈ ٹیم چیمپیئن شپ میں سلور میڈل پاکستان کے لیے ایک تاریخی کامیابی ہے، جو عزم، کھیلوں کے جذبے اور ٹیم کے اتحاد سے بھرپور ایک یادگار مہم کے اختتام کی علامت ہے۔
