اسلام آباد ڈی چوک سے میاں بیوی کو گرفتار کرلیا گیا ہے۔ جوڑے کو پولیس وین پر سوار کیا گیا تو خاتون کی جانب سے بار بار یہ کہا جاتا رہا ہے کہ وہ یہاں ایک قریبی پارک میں ٹہلنے کے لیے آئے تھے اور ان کو گرفتار کر لیا گیا ہے۔
ادھر پولیس کی جانب سے کہا گیا کہ یہ پی ٹی آئی کے کارکنان ہیں، انہیں اسی لیے گرفتار کیا گیا ہے۔ اسلام آباد کے تمام شہریوں کو علم ہے کہ پی ٹی آئی کے اعلان کردی احتجاج کے باعث ڈی چوک کو کنٹینرز کی مدد سے بند کیا جا چکا ہے۔ پولیس نے میاں بیوی کو قیدی وین میں ڈال کر تھانے منتقل کر دیا ہے۔
مزید پڑھیں: 24نومبر احتجاج: اسلام آباد کے ڈی چوک تک پہنچنے کے لیے پی ٹی آئی کا پلان کیا ہے؟
واضح رہے کہ عمران خان کے حکم پر 24نومبر(آج) کو پی ٹی آئی کی اسلام آباد کی جانب احتجاجی کال کے باعث جڑواں شہروں میں کاروبار زندگی عملاً معطل ہے۔ دونوں شہروں کی مرکزی شاہراہیں، پبلک ٹرانسپورٹ اور فیض انٹرچینج کوبند کر دیا گیا ہے۔جب کہ قانون نافذ کرنے والے ادارے کسی بھی ناخوشگوار صورتحال سے نمٹنے کے لیے تیار ہیں۔
