آئل اینڈ گیس ریگولیٹری اتھارٹی (اوگرا) نے دسمبر کے لیے ایل پی جی کی قیمت میں اضافے کا اعلان کردیا ہے۔
نئے نوٹیفکیشن کے مطابق ایل پی جی کی فی کلو قیمت 254 روپے 30 پیسے مقرر کی گئی ہے جس میں ایک روپے 32 پیسے فی کلو اضافہ کیا گیا ہے۔
اس کے نتیجے میں 11.8 کلو گرام کے گھریلو ایل پی جی سلنڈر کی قیمت اب 3079 روپے ہو گئی ہے۔ نومبر میں اسی سلنڈر کی قیمت 2,999.47 روپے تھی، جس میں 79.53 روپے اضافہ کیا گیا ہے۔ قیمتوں میں اس اضافے سے گھریلو توانائی کی لاگت پر مزید اثر پڑنے کی توقع ہے۔
یہ بھی پڑھیں:ایل پی جی کی قیمت میں 7 روپے 31 پیسے فی کلو اضافے کا اعلان
دوسری جانب وفاقی حکومت کی جانب سے دسمبر 2024 کے لیے آئندہ 15 روزہ جائزے کے دوران پاکستان میں پیٹرول اور ڈیزل کی قیمتوں پر نظر ثانی متوقع ہے۔ پیٹرولیم مصنوعات کی نئی قیمتوں کا اعلان 30 نومبر کی رات کو کیا جائے گا جس کا اطلاق یکم سے 15 دسمبر تک ہوگا۔
میڈیا رپورٹس کے مطابق پیٹرول کی قیمت میں 3 روپے 15 پیسے، ڈیزل کی قیمت میں 3 روپے 20 پیسے اور مٹی کے تیل کی قیمت میں 4 روپے فی لیٹر اضافے کا امکان ہے۔ عالمی سطح پر خام تیل کی قیمتوں میں اتار چڑھاؤ کو ممکنہ اضافے کا بنیادی عنصر قرار دیا گیا ہے۔
مزید پڑھیں:ایل پی جی کی قیمت میں اضافہ، اوگرا نے نوٹیفکیشن جاری کردیا
پیٹرولیم مصنوعات کی قیمتوں کا حتمی فیصلہ ہفتہ کے روز 30 نومبر کو کیا جائے گا۔ وزارت پیٹرولیم، وزارت خزانہ کے لیے سفارشات تیار کر رہی ہے اور نئی قیمتوں کا اعلان وزیر خزانہ محمد اورنگزیب اور وزیراعظم شہباز شریف کی مشاورت کے بعد کیا جائے گا۔
اس وقت پیٹرول کی قیمت 248.38 روپے فی لیٹر، ہائی اسپیڈ ڈیزل کی قیمت 255.14 روپے فی لیٹر، لائٹ ڈیزل آئل کی قیمت 147.51 روپے فی لیٹر اور مٹی کے تیل کی قیمت 161.54 روپے فی لیٹر ہے۔
یہ بھی پڑھیں:ایل پی جی کے گھریلو سلینڈر کی قیمت میں اضافہ، نوٹیفکیشن جاری
متوقع تبدیلیوں سے صارفین اور صنعتوں دونوں پر اثر انداز ہونے کا امکان ہے کیونکہ عالمی سطح پر تیل کی قیمتوں میں اتار چڑھاؤ مقامی مارکیٹوں پر اثر انداز ہوتا رہتا ہے۔
