کراچی ایئرپورٹ دھماکا: دہشتگرد کیسے اور کہاں چھپے رہے، ہوشربا انکشافات سامنے آگئے

قانون نافذ کرنے والے اداروں نے کراچی ائیرپورٹ کے قریب چینی قافلے پر حملہ کرنے والے دہشتگردوں کے ٹھکانے کا پتا لگا لیا ہے۔

میڈیا رپورٹس کے مطابق، دہشتگردوں نے خودکش حملے کی تیاری کراچی میں پی آئی بی کالونی تھانے کی حدود میں پرانی سبزی منڈی کے ایک فلیٹ میں کی۔

یہ بھی پڑھیں: کراچی ایئرپورٹ دھماکا کیس میں بڑی پیشرفت، خاتون اور بینک عملے سمیت کئی سہولت کار گرفتار

رپورٹس کے مطابق، دہشتگردوں نے پرانی سبزی منڈی میں 8 ماہ قبل فلیٹ کرائے پر لیا تھا جہاں وہ اسٹوڈنٹ بن کر رہ رہے تھے۔ قانون نافذ کرنے والے اداروں نے دہشتگردوں کے اس ٹھکانے کو سیل کردیا ہے۔

میڈیا رپورٹس میں ذرائع کا حوالہ دیکر بتایا گیا ہے کہ مذکورہ فلیٹ سے ائیر پورٹ کا نقشہ، ڈی این اے سیمپلز، دھماکا خیزمواد کے ذرات، کپڑے اور بال ملے ہیں، تمام نمونے ڈی این اے کے لیے محفوظ کرلیے گئے ہیں۔

رپورٹس میں مزید کہا گیا ہے کہ ایئرپورٹ دھماکے میں ملوث گرفتار ملزمہ 2 مرتبہ اس فلیٹ پر آئی تھی، دہشتگردوں نے 12 ہزار روپے میں 2 کمروں کا فلیٹ کرائے پر لیا تھا جبکہ مرکزی سہولت کار 8 ماہ سے اس فلیٹ میں رہائش پذیر تھے۔

یہ بھی پڑھیں: کراچی ایئرپورٹ کے قریب دھماکا، تحقیقاتی اداروں کی تفتیش میں کیا سامنے آیا؟

ذرائع نے مزید بتایا ہے کہ جس گاڑی کو خودکش دھماکے میں تباہ کیا گیا اس میں بارود بلوچستان سے ہی بھر کر لایا گیا تھا، تاہم دھماکے کے لیے سرکٹ اور اگنیشن سسٹم کراچی میں موجود تھا۔

میڈیا رپورٹس میں مزید بتایا گیا ہے کہ سبزی منڈی میں واقع اس فلیٹ سے ائیرپورٹ اور دیگرمقامات کی ریکی کی جاتی رہی۔ گرفتار ملزم اور ملزمہ سے اس بارے میں مزید تفتیش کی جارہی ہے، اب تک جے آئی ٹی کے دو سیشن ہوچکے ہیں۔

یہ بھی پڑھیں: کراچی ایئرپورٹ دھماکا دہشتگردوں نے ملک دشمن غیر ملکی خفیہ ایجنسی کی مدد سے کیا، ابتدائی رپورٹ