پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ چیمپیئنز ٹرافی کے معاملے پر قوم کی توقعات سے بڑھ کر چیزیں ہوں گی، لوگوں کو مایوس نہیں کریں گے۔
لاہور میں میڈیا سے گفتگو کرتے ہوئے انہوں نے کہاکہ آئی سی سی کی آج ہونے والی میٹنگ مؤخر ہوگئی ہے، جو بھی فیصلہ ہوگا اس سے عوام کو آگاہ کیا جائے گا۔
یہ بھی پڑھیں چیمپیئنز ٹرافی 2025: بھارت نے پاکستانی فارمولے پر گھٹنے ٹیک دیے؟
انہوں نے کہاکہ آنے والے دنوں میں چیزیں بہتر ہوں گی، کچھ خبریں جو چل رہی ہیں وہ حقیقت پر مبنی نہیں۔ ہم پوری کوشش کریں گے کہ پاکستان اور انٹرنیشنل کرکٹ کے لیے بہتری ہو۔ پورے پاکستان میں جہاں گراؤنڈز ہیں ان کی حالت بہتر کی جائے گی۔
محسن نقوی نے کہاکہ اگر آئی سی سی میں کوئی ڈینٹ آئے تو اس سے پوری دنیا کی کرکٹ کو نقصان ہوتا ہے، پاکستان نے ہمیشہ مثبت کردار ادا کیا ہے اور کرتا رہے گا۔
واضح رہے کہ چیمپیئنز ٹرافی کا ایونٹ آئندہ برس پاکستان میں شیڈول ہے، تاہم بھارت نے سیکیورٹی کو بہانہ بنا کر اپنی ٹیم پاکستان بھیجنے سے انکار کردیا ہے۔
دوسری جانب پاکستان کرکٹ بورڈ کا مؤقف ہے کہ اگر بھارت پاکستان آکر نہیں کھیلتا تو ہم بھی آئندہ ان کے ساتھ کوئی ٹورنامنٹ نہیں کھیلیں گے۔
یہ بھی پڑھیں چیمپیئنز ٹرافی 2025: پی سی بی کا پیش کردہ ’پارٹنرشپ یا فیوژن فارمولا‘ کیا ہے؟
پاکستان اور بھارت کے درمیان چپقلش کی وجہ سے ٹورنامنٹ متاثر ہونے کے خدشات ہیں، جس کے باعث پاکستان کرکٹ بورڈ اور آئی سی سی کے حکام کے درمیان بات چیت چل رہی ہے۔
