وزیراعظم شہباز شریف نے شام میں پھنسے پاکستانیوں کی وطن واپسی کے لیے لبنان کے وزیراعظم نجیب میقاتی سے مدد مانگ لی۔
پیر کے روز وزیراعظم شہباز شریف نے لبنانی ہم منصب نجیب میقاتی سے ٹیلی فونک رابطہ کیا، وزیراعظم نے لبنان کے خلاف اسرائیل کی فوجی جارحیت کی سخت ترین الفاظ میں مذمت کا اعادہ کرتے ہوئے وزیراعظم نے لبنان کی خودمختاری اور علاقائی سالمیت کے لیے پاکستان کی غیر متزلزل حمایت کے عزم کا اظہار کیا۔
یہ بھی پڑھیں: لبنان جنگ بندی: گھر بار چھوڑنے پر مجبور لوگوں کی واپسی شروع
شہباز شریف نے لبنان کے لیے جنگ بندی کے معاہدے کا خیرمقدم کیا اور فلسطینی عوام کے لیے بھی اسی طرح کے جنگ بندی کے معاہدے پر زور دیا۔
لبنان اور پاکستان کے درمیان برادرانہ اور گرمجوشی پر مبنی تعلقات کا ذکر کرتے ہوئے وزیر اعظم شہباز شریف نے کہا کہ پوری پاکستانی قوم اس مشکل وقت میں لبنان کے عوام کے ساتھ یکجہتی کے ساتھ کھڑی ہے۔ اس جذبے کے تحت، پاکستان نے لبنان میں اپنے بھائیوں اور بہنوں کو انسانی بنیادوں پر امداد فراہم کی اور مستقبل میں بھی ہر ممکن مدد فراہم کرنے کے لیے تیارہے۔
دونوں رہنماؤں نے شام کی بدلتی ہوئی صورتحال پر بھی تبادلہ خیال کیا، وزیراعظم نے بیروت کے راستے شام میں پھنسے پاکستانی شہریوں کے فوری انخلا میں سہولت فراہم کرنے کے لیے نجیب میقاتی کی ذاتی مداخلت اور مدد کی درخواست کی۔
یہ بھی پڑھیں: شام میں تمام پاکستانی شہری محفوظ ہیں، دفتر خارجہ
لبنان کے وزیراعظم نجیب میقاتی نے لبنان کے خلاف اسرائیل کی فوجی جارحیت پر پاکستان کی غیرمتزلزل حمایت اور اصولی مؤقف پر وزیراعظم شہباز کا شکریہ ادا کیا۔
انہوں نے کہا کہ یہ دونوں ممالک کے درمیان گرمجوشی پر مبنی برادرانہ تعلقات کی ایک مثال ہے، انہوں نے وزیراعظم شہباز کو یقین دلایا کہ لبنان شام سے پاکستانیوں کے انخلا میں ہر ممکن مدد کرے گا۔
بعد ازاں وزیر اعظم محمد شہباز شریف نے نے شام اور لبنان میں تعینات پاکستانی سفرا سے بھی رابطہ کیا اور انہیں شام میں پھنسے پاکستانیوں کے انخلا کے حوالے سے ہر ممکن تعاون اور مدد فراہم کرنے کی ہدایت کی۔
