آئی جی پولیس اسلام آباد نے سوشل میڈیا پر جھوٹا پروپیگنڈا کرنے والے مزید 4 ملزمان کو نوٹسز جاری کر دیے ہیں، سوشل میڈیا پر بدنیتی پر مبنی مہم کے سلسلے میں پہلے بھی 7 افراد کو نوٹسز جاری کیے گئے تھے۔
ان 7 افراد میں صبغت اللہ ورک، محمد ارشد، عطا الرحمن، اظہر مشوانی، عروسہ ندیم شاہ، کومل آفریدی اور ایم علی ملک شامل تھے، ان ملزمان کو 13 دسمبر طلب کیا گیا۔
اسی سلسلے میں مزید 4 ملزمان کو نوٹسز جاری کیے گئے ہیں، ان میں سردار اظہر طارق خان، سراج احمد، آصف رشید اور محمد ارشد شامل ہیں، نوٹس میں جے آئی ٹی نے ملزمان کو 16 دسمبر کو طلب کیا ہے۔ ان ملزمان نے سوشل میڈیا پر جھوٹے پروپیگنڈےکے ذریعے پاکستان میں انتشار پھیلایا۔
مزید پڑھیں: بدنیتی پر مبنی سوشل میڈیا مہم چلانے پر اظہر مشوانی و دیگر کو جے آئی ٹی نے طلب کرلیا
وفاقی حکومت نے سوشل میڈیا پر جرائم کی روک تھام کے لیے PECA ایکٹ 2016 کے سیکشن 30 کے مطابق آئی جی پولیس کے ماتحت ایک مشترکہ تحقیقاتی ٹیم کی تشکیل دی ہے جو ملزمان اور ان کے ساتھیوں کے پسِ پردہ مقاصد کا تعین کرنے کے لیے معاملے کی تحقیقات کر رہی ہے۔
واضح رہے کہ مزید مجرموں کی شناخت اور ان کے خلاف قابل اطلاق قوانین کے تحت کارروائی عمل میں لائی جا رہی ہے۔ جے آئی ٹی کے پاس ملزمان کے خلاف ٹھوس شواہد بھی موجود ہیں۔
