وفاقی وزیر داخلہ محسن نقوی نے ریاض میں سعودی وزیر داخلہ شہزادہ عبد العزیز بن سعود بن نایف سے وزارت داخلہ کے ہیڈکوارٹر میں ملاقات کی۔ ملاقات میں پاکستان اور سعودی عرب کے درمیان سیکیورٹی تعاون پر تفصیلی بات چیت کی گئی۔ دونوں رہنماؤں نے منشیات کی اسمگلنگ کے خاتمے اور باہمی دلچسپی کے دیگر امور پر بھی تبادلہ خیال کیا۔
سعودی وزیر داخلہ شہزادہ عبدالعزیز بن سعود نے محسن نقوی اور ان کے وفد کا خیر مقدم کیا۔ محسن نقوی نے کہا کہ ہر پاکستانی کا سعودی عرب کے ساتھ عقیدت اور احترام کا رشتہ ہے۔ انہوں نے مزید کہا کہ سعودی عرب نے ہمیشہ مشکل وقت میں پاکستان کا ساتھ دیا ہے۔ انہوں نے سعودی قیادت اور عوام کے لیے نیک خواہشات کا اظہار کیا اور سعودی عرب کی حمایت پر دلی شکریہ ادا کیا۔
اس موقع پر سعودی نائب وزیر داخلہ ناصر الداؤد، انڈر سیکریٹری ڈاکٹر خالد البطال، ڈائریکٹر پبلک سیکیورٹی لیفٹیننٹ جنرل محمد البسامی اور ڈائریکٹر جنرل انسداد منشیات میجر جنرل محمد القرنی بھی موجود تھے۔
پاکستانی وفد میں سعودی عرب میں پاکستانی سفیر احمد فاروق، ڈائریکٹر جنرل پاسپورٹ اینڈ امیگریشن مصطفیٰ جمال قاضی اور وزارت داخلہ کے ایڈیشنل سیکریٹری رفعت مختار راجہ بھی شامل تھے۔
