وفاقی کابینہ نے اسلام آباد کی حدود میں نکاح نامے میں ختمِ نبوت کے حلف کی شق شامل کرنے کی منظوری دے دی۔
وزیراعظم شہباز شریف کی زیرصدارت وفاقی کابینہ کے اجلاس میں اہم امور پر غور کیا گیا، شہباز شریف نے وفاقی وزارتِ صحت اور وفاقی وزارتِ داخلہ کو پارا چنار میں دواؤں کی قلت کے حوالے سے فوری اقدامات اٹھانے اور ادویہ پہنچانے کی ہدایت کردی۔
یہ بھی پڑھیں وفاقی کابینہ نے پُرتشدد انتہا پسندی کی روک تھام سے متعلق قومی پالیسی کی منظوری دے دی
اجلاس کے بعد جاری اعلامیہ کے مطابق وفاقی کابینہ نے اقوامِ متحدہ کے کنونشن برائے بین الاقوامی تصفیہ جات کے معاہدوں پر دستخط کی منظوری دے دی۔
وفاقی کابینہ نے وزارتِ مذہبی امور اور بین المذاہب ہم آہنگی کی سفارش پر اسلام آباد کیپیٹل ٹیریٹری کی حدود میں نکاح نامے میں ختمِ نبوت کے حلف کی شق شامل کرنے کی منظوری دے دی۔
وفاقی کابینہ نے وزارتِ قانون و انصاف کی سفارش پر کوڈ آف کریمنل پروسیجر ترمیمی بل 2024 کو پارلیمنٹ بھیجنے کی منظوری دے دی۔
کابینہ کو بریفنگ دی گئی کہ وفاقی حکومت کے 18 ڈویژنز میں ای آفس کا 100 فیصد نفاذ کیا جا چکا ہے۔ کابینہ نے وزارتِ داخلہ کی سفارش پر نیشنل رجسٹریشن اینڈ بائیو میٹرک پالیسی فریم ورک 2024 کی منظوری دے دی۔
اس کے علاوہ وفاقی کابینہ نے وزارتِ قانون و انصاف کی سفارش پر انٹلیکچول پراپرٹی ٹریبیونل کوئٹہ کے قیام کی منظوری دے دی۔
وفاقی کابینہ نے وزارتِ قانون و انصاف کی سفارش پر 20 دسمبر 2018 کی ثالثی کے نتیجے میں اقوامِ متحدہ کے کنونشن برائے بین الاقوامی تصفیہ جات کے معاہدوں پر دستخط کی منظوری دے دی۔
وفاقی کابینہ نے کراچی پورٹ ٹرسٹ کے ایچ آر منیجر ارباب انس کی ملازمت سے برخاستگی کے خلاف دائر کی گئی اپیل مسترد کردی۔
وفاقی کابینہ نے وزارتِ پیٹرولیم کی سفارش پر بھاری کثافت والے دھماکہ خیز مواد کی تیاری کے لائسنز کے حوالے سے ایکسپلوسوز رولز 2010 کے فارم ای ایل 01 میں ترامیم کی منظوری دے دی۔
وفاقی کابینہ نے وزارتِ توانائی، پاور ڈویژن کی سفارش پر ضلع اپر کوہستان، ضلع لوئر کوہستان اور ضلع کولائی پالس کوہستان کی پشاور الیکٹرک سپلائی کمپنی سے ہزارہ الیکٹرک پاور کمپنی منتقلی کی منظوری دے دی۔
وفاقی کابینہ کو کابینہ سیکرٹریٹ کی جانب سے وفاقی امور کے حوالے سے پرنسپلز آف پالیسی کے نفاذ کی رپورٹس برائے سال 22-2021 اور 23-2022 پیش کی گئیں۔
وفاقی کابینہ کو کابینہ ڈویژن کی جانب سے نیشنل الیکٹرک پاور ریگولیٹری اتھارٹی کی 3 سال کی رپورٹس پیش کی گئیں، یہ رپورٹس اب مشترکہ مفادات کونسل کو بھیجی جائیں گی۔
وفاقی کابینہ نے کابینہ کمیٹی برائے قومی ملکیتی ادارہ جات کے 4 دسمبر 2024 کے اجلاس میں کیے گئے فیصلوں کی توثیق کردی۔
یہ بھی پڑھیں آئندہ برس سرکاری حج پیکج کتنا ہوگا؟ وفاقی کابینہ نے حج پالیسی 2025 کی منظوری دے دی
وفاقی کابینہ نے کابینہ نے کمیٹی برائے انٹر گورنمنٹ ٹرانزیکشنز کے 20 نومبر 2024 اور 21 نومبر 2024 کے اجلاس میں کیے گئے فیصلوں کی بھی توثیق کردی۔
