وزیر دفاع خواجہ آصف نے سانحہ 9 مئی کے ملزمان کو سزا دینے کے فیصلے پر ردعمل کا اظہار کرتے ہوئے کہا کہ ہے جب تک 9 مئی کے منصوبہ ساز گرفت میں نہیں آجاتے، یہ سلسلہ اس وقت تک جاری رہے گا۔
سماجی رابطے کی ویب سائٹ ’ایکس‘ پر ایک پوسٹ میں انہوں نے کہا، ’آج سانحہ 9 مئی کے 25 ملزموں کو سزائیں سنائی گئی ہیں، ہونا تو چاہیے تھا کہ امریکا اور برطانیہ کی طرح فوری انصاف ہوتا، اس تاخیر نے ملزموں اور ان کے سہولت کاروں کے حوصلے بڑھائے ہیں‘۔
انہوں نے کہا کہ 9 مئی کے تاریک دن کی مذمت سے بھی گریز کیا گیا، سانحہ 9 مئی کو شہدا اور غازیوں کی توہین کرنے والوں کو ہیرو بنا یا گیا، ابھی تو جو کارکن استعمال ہوئے قانون کے ہاتھ ان کے گریبان تک پہنچے۔
آج سانحہ 9مئی کے 25ملزموں کو سزائیں سنائی گئی ھیں۔ ھونا تو چاہئے تھا کہ امریکہ اور برطانیہ کی طرح فوری انصاف ھوتا۔ اس تاخیر نے ملزموں اور انکے سہولت کاروں کے حوصلے بڑھاۓ۔ ایک تاریک دن کی مذمت سے بھی گریز کیا گیا۔ جس سے شہداء اور غازیوں کی توہین کرنے والوں کو ھییرو بنا یا گیا۔…
— Khawaja M. Asif (@KhawajaMAsif) December 21, 2024
خواجہ آصف نے کہا کہ جو اس بھیانک دن کے منصوبہ ساز تھے قانون جب تک ان پر ہاتھ نہیں ڈالتا تب تک اس سلسلے کا اختتام نہیں ہوگا، ایسے عناصر کے حوصلے وطن دشمن بڑھاتے رہیں گے۔
یہ بھی پڑھیں: بہت ہوگیا، اب 9 مئی کی دھول بیٹھنی چاہیے، بیرسٹر گوہر
واضح رہے کہ آج آئی ایس پی آر کی جانب سے جاری اعلامیے میں کہا گیا ہے کہ فیلڈ جنرل کورٹ مارشل نے پہلے مرحلے میں 9 مئی سانحے کے 25 ملزمان کو سزائیں سنادی ہیں، یہ سزائیں تمام شواہد کی جانچ پڑتال اور مناسب قانونی کارروائی کی تکمیل کے بعد سنائی گئی ہیں، سزا پانے والے ملزمان کو قانونی تقاضے پورے کرنے کے لیے تمام قانونی حقوق فراہم کیے گئے۔
