پیپلز پارٹی کے رکن قومی اسمبلی ڈاکٹر مرزا اختیار بیگ نے کہا ہے کہ شرجیل میمن اور آئی جی سندھ سے دھرنوں کے بارے میں بات چیت ہوئی ہے، انہوں نے کہا ہے کہ دھرنے آج شام ختم ہو جائیں گے۔ کراچی میں دھرنے اب پُر امن نہیں رہے۔
سندھ ہائیکورٹ کراچی میں میڈیا سے گفتگو میں ان کا کہنا تھا کہ پارا چنار میں جو ہوا اس پر افسوس ہے، لیکن کراچی کے شہریوں کو کس بات کی سزا مل رہی ہے۔ مجھے امید ہے کہ سوموار کی شام تک دھرنوں کا مسئلہ حل ہو جائے گا۔
کراچی میں پانچویں روز بھی دھرنا جاری، شہریوں کو شدید مشکلات
کراچی میں پارا چنار کے مظاہرین سے اظہار یکجہتی کے لیے مذہبی جماعت کی جانب سے کراچی کے مختلف علاقوں اور مرکزی شاہراہوں پر دھرنے پانچویں روز بھی جاری ہیں جس کے سبب شہریوں کو شدید مشکلات کا سامنا کرنا پڑ رہا ہے۔
کراچی کے مختلف علاقوں میں پارا چنار سے یکجہتی کے لیے دھرنے جاری ہیں اور 12 مقامات پر احتجاج کیا جارہا ہے جب کہ رات سے جوہر موڑ پر بھی دھرنے کا آغاز کردیا گیا ہے۔ کراچی میں مختلف مقامات پر دھرنوں کے باعث ٹریفک کو متبادل ٹریک پر چلایا جارہا ہے جبکہ شہر میں مختلف مقامات پر پارا چنار میں ہونے والے واقعے پر احتجاجی مظاہرے جاری ہیں۔
ٹریفک پولیس کے مطابق شارعِ فیصل پر ناتھا خان پل اور ملیر 15 میں جاری دھرنا ختم کردیا گیا ہے، 26 دسمبر سے بند شارعِ فیصل کے دونوں اطراف کی سڑکیں کھول دی گئی ہیں۔ مین جنا ح روڈ نمائش چورنگی ٹریفک کے لیے بند ہے جب کہ ٹریفک کو 45 کانگریس سے پی پی چورنگی گرو مندر سے سولجر بازار، سوسائٹی سگنل سے کوریڈور تھری ،بریٹو روڈ سے سولجر بازار اور گرو مندر کی طرف ڈائیورشن دی ہے۔
مزید پڑھیں: گرینڈ جرگہ: کرم میں قیام امن کے لیے فریقین کے درمیان معاہدہ طے پا گیا
کامران چورنگی چاروں طرف ٹریفک کے لیے بند ہے۔ ٹریفک کو موسمیات سے یونیورسٹی روڈ اور منور چورنگی سے اندرون علاقوں کی طرف ڈائیورشن دی ہے۔ جوہر موڑ جانب جوہر چورنگی آنے جانے والے دونوں روڈ بند ہیں۔ ٹریفک کو جوہر موڑ سے سیدھا نیپا کی طرف اور جوہر چورنگی سے جوہر موڑ آنے والی ٹریفک کو پرفیوم چوک سے یوٹرن دے کر واپس جوہر چورنگی کی طرف بھیج رہے ہیں۔
گلستان جوہر بلاک 19 اور 20 کے درمیان امام بارگاہ کٹ مین پروفیسر غفور احمد روڈ آنے جانے والے دونوں روڈ بند ہیں۔ ٹریفک کو جوہر موڑ سے سیدھا نیپا جب کہ نیپا سے جوہر آنے والی ٹریفک کو جوہر موڑ چھیپا یوٹرن سے واپس نیپا کی طرف بھیج رہے ہیں۔ صفورہ چورنگی نورالہیٰ ہوٹل کے سامنے سے چیک پوسٹ نمبر 5 اور رم جھم ٹاور جانے والا روڈ ٹریفک کے لیے بند ہیں۔ ٹریفک کو صفورہ سے کرن اسپتال کی طرف ڈائیورشن دی گئی ہے۔
ابو الحسن اصفہانی روڈ جانب سپر ہائی وے عباس ٹاؤن کے سامنے اطراف کی سڑکیں بند ہیں۔ ٹریفک کو پیراڈائز بیکری سے فاریہ چوک و اندرون گلیوں کی طرف، رینجر کٹ سے سروس روڈ جانب پنجاب اڈہ کی طرف ڈائیورشن دی ہے۔ فائیو اسٹار چورنگی مکمل بند ہے اور متبادل راستے پر سروس روڈ سے ٹریفک کی روانی جاری ہے۔
مزید پڑھیں: کرم گرینڈ جرگہ کوہاٹ میں جاری، ڈیڈلاک نہیں آج معاہدہ طے ہوجائے گا، بیرسٹرسیف
یونیورسٹی روڈ میٹرو شاپنگ سینٹر سمامہ جانب نیپا سڑک بند ہے جب کہ متبادل راستہ ٹریفک کو اندرون علاقوں میں ڈائیورشن دے دی گئی ہے۔ شمس الدین عظیمی روڈ کے ڈی اے فلیٹ جانب سرجانی روڈ ٹریفک کے لیے بند ہے اور متبادل راستہ کے لیے ٹریفک کو ٹوٹل پیٹرول پمپ سے سروس روڈ کی طرف ڈائیورشن دی ہے۔ انچولی شاہراہ پاکستان جانب سہراب گوٹھ ٹریفک کے لیے بند ہے اور واٹر پمپ چورنگی سے کارڈیو ہسپتال و گلبرگ چورنگی کی طرف ڈائیورشن دی ہے۔
نواب صدیق علی خان روڈ چورنگی ناظم آباد نمبر 1 جانب ناظم آباد نمبر2 ٹریفک کے لیے بند ہے جبکہ ٹریفک کو لسبیلہ سے تین ہٹی کی طرف ڈائیورشن دی ہے۔ پاور ہاؤس چورنگی ناگن سے جانب 4k فضل الہی روڈ ٹریفک کے لئے بند ہے جس کے لیے ٹریفک کو پاور ہاؤس چورنگی سے پہلے شیل پمپ کٹ سے سروس روڈ پر چلا رہے ہیں جبکہ دوسرا روڈ ٹریفک کے لیے چل رہا ہے۔
شاہراہ پاکستان مین عائشہ منزل چورنگی ٹریفک کے لیے بند ہے اور کریم آباد سے آنے والی ٹریفک کو آئی آر سی سے عائشہ منزل برج و اندرونی علاقہ کی طرف ، واٹر پمپ سے آنے والی ٹریفک کو عرشی مارکیٹ و اندرون علاقے میں بھیج رہے ہیں۔ پاکستان ایئرپورٹ اتھارٹی نے کہا گیا ہے کہ کراچی میں جاری دھرنوں کے باعث گزشتہ کئی دن سے پروازیں 30 منٹ تا ایک گھنٹے کی تاخیر سے روانہ ہوئی ہیں۔
