وفاقی حکومت نے عام انتخابات کا ایک سال مکمل ہونے پر 8 فروری کو ملک میں یوم تعمیر و ترقی منانے کا اعلان کردیا۔
وفاقی وزیر اطلاعات و نشریات عطااللہ تارڑ نے اسلام آباد میں میڈیا سے گفتگو کرتے ہوئے کہاکہ سیاست میں رواداری ہونی چاہیے، معیشت کے حوالے سے اچھی خبریں آرہی ہیں۔
یہ بھی پڑھیں وفاقی حکومت کے قرضوں کا حساب کتاب اسٹیٹ بینک نے بتادیا
انہوں نے کہاکہ سیاست ہو یا کھیل کا میدان ہر جگہ تلخیاں کم ہونی چاہییں، اور اسپورٹس مین اسپرٹ کا مظاہرہ کرنا چاہیے۔
وزیر اطلاعات عطااللہ تارڑ نے کہاکہ 8 فروری کو ملک میں تعمیر و ترقی کا آغاز ہوا تھا، اس لیے اس دن کو یوم تعمیر و ترقی کے طور پر منائیں گے۔
عطااللہ تارڑ نے کہاکہ چیمپیئنز ٹرافی کا پاکستان میں ہونا خوش آئند ہے، ہمارے میدانوں کی رونقیں بحال ہورہی ہیں۔ پاکستان کرکٹ بورڈ نے ایونٹ سے متعلق کوشش کی ہے۔ ویسٹ انڈیز کے خلاف بھی قومی کرکٹ ٹیم کی کارکردگی شاندار رہی۔
یہ بھی پڑھیں نواز شریف اور شہباز شریف حکومت نہیں بنانا چاہتے تھے، سینیئر لیگی رہنما کا انکشاف
واضح رہے کہ 8 فروری کو ملک میں عام انتخابات کا ایک سال مکمل ہوجائےگا، بانی پی ٹی آئی عمران خان نے انتخابات کو دھاندلی زدہ قرار دیتے ہوئے پارٹی کو احتجاجی حکمت عملی بنانے کی ہدایت کی ہے۔
