صدر مملکت آصف علی زرداری نے پیکا ایکٹ ترمیمی بل اور ڈیجیٹل نیشنل پاکستان بل کی منظوری دے دی۔
ایوان صدر کے مطابق صدر مملکت نے نیشنل کمیشن آن دی اسٹیٹس آف ویمن ( ترمیمی) بل 2025 کی بھی توثیق کردی۔
یہ بھی پڑھیں صحافی برادری نے پیکا ایکٹ ترمیمی بل مسترد کردیا، ملک گیر احتجاجی مظاہرے
واضح رہے کہ پیکا ایکٹ ترمیمی بل، ڈیجیٹل نیشنل پاکستان بل اور نیشنل کمیشن آن دی اسٹیٹس آف ویمن ( ترمیمی) بل 2025 منظوری کے لیے ایوان صدر کو ارسال کیے گئے تھے۔
اس سے قبل یہ خبر سامنے آئی تھی کہ صدر مملکت نے صحافیوں کے احتجاج پر پیکا ایکٹ ترمیمی بل پر دستخط روک دیے ہیں، تاہم اب ایوان صدر کا کہنا ہے کہ صدر مملکت آصف زرداری نے بل پر دستخط کردیے ہیں۔
گزشتہ روز صحافتی تنظیموں نے ملک بھر میں متنازعہ پیکا ایکٹ ترمیمی بل کے خلاف احتجاج کیا تھا اور اسے کالا قانون قرار دیا گیا تھا۔
مسلم لیگ ن کے سینیئر رہنما سینیٹر عرفان صدیقی نے گزشتہ روز کہا تھا کہ پیکا ایکٹ ترمیمی بل پر صحافیوں کے خدشات درست ہیں، انہیں دور کرنا چاہیے۔ ان کا یہ بھی کہنا تھا کہ پیکا ایکٹ ترمیمی بل کوئی صحیفہ نہیں اس میں ترمیم ہو سکتی ہے، ہم صحافیوں کو آن بورڈ لیں گے۔
یہ بھی پڑھیں صحافت سے منسلک کوئی بھی شخص پیکا ایکٹ ترمیمی بل سے متاثر نہیں ہوگا، وزیراطلاعات
انہوں نے نجی ٹی وی سے گفتگو کے دوران اس بات پر حیرت کا اظہار کیاکہ پیکا ایکٹ ترمیمی بل وزارت داخلہ کی جانب سے کیوں پیش کیا گیا ہے۔
