وزیراعلیٰ خیبرپختونخوا علی امین گنڈاپور نے کہا ہے کہ آستین کے سانپ ہر سیاسی جماعت میں ہوتے ہیں مگر ہماری پارٹی میں زیادہ ہوگئے ہیں۔
نجی چینل سے گفتگو کرتے ہوئے وزیراعلیٰ علی امین گنڈاپور نے کہا کہ کوئی بھی شخص جو خود کو پارٹی سے منسلک کرلیتا ہے اور پھر بیانات دیتا ہے یا ایسی کوئی حرکت کرتا ہے جس سے پارٹی کو نقصان ہوتا ہے تو وہ آستین کا سانپ ہی کہلاتا ہے۔
یہ بھی پڑھیں: علی امین گنڈاپور ویلنٹائن ڈے کیسے منائیں گے؟
انہوں نے کہا کہ جو لوگ پارٹی منشور کے برعکس پروپیگنڈا کررہے ہیں، وہ بانی پی ٹی آئی عمران خان کی بہنوں کے خلاف جارہے ہیں، اسی لیے وہ آستین کے سانپ ہیں۔
مذاکرات سے متعلق سوال پر علی امین گنڈاپور نے کہا کہ حکومت کمیشن بنانے سے ڈر رہی ہے، جب یہ کمیشن بنا لیں گے تو تمام حقائق سامنے آجائیں گے، اگر ہمارے لوگ قصوروار ہوئے تو تسلیم کریں گے۔
