عمران خان کا خط آئینی بینچ کمیٹی کو بھیج دیا ہے، چیف جسٹس یحییٰ آفریدی

چیف جسٹس آف پاکستان جسٹس یحییٰ آفریدی نے کہا کہ عمران خان کی جانب سے موصول خط میں انہوں نے ازخود اختیارات کے حوالے سے سپریم کورٹ کو نوٹس لینے کی درخواست کی تھی۔

سپریم کورٹ میں آئی ایم ایف کے وفد سے ملاقات کے بعد صحافیوں کو بریفنگ دیتے ہوئے چیف جسٹس نے بتایا کہ سابق وزیراعظم عمران خان کا خط آئینی بینچ کمیٹی کو بھجوا دیا ہے، کمیٹی اس خط کو دیکھے اور سماعت کے لیے مقرر کرنے کا فیصلہ کرے۔

یہ بھی پڑھیں:چیف جسٹس یحییٰ آفریدی نے کراچی جیل اصلاحات کے لیے ذیلی کمیٹی تشکیل دیدی

چیف جسٹس یحییٰ آفریدی نے بتایا کہ عمران خان نے خط کے ساتھ ایک یو ایس بی فلیش ڈرائیو بھی بھیجی گئی ہے کہ جس میں میٹیریل ہے۔عمران خان کے خط میں اٹھائے گئے معاملات سنجیدہ نوعیت کے ہیں، چیف جسٹس کے مطابق انہوں نے آفس سے کہا ہے کہ اسے آئینی بینچ کو بھجوا دیں اور وہ سماعت کے لیے مقرر کریں۔

چیف جسٹس یحییٰ آفریدی نے ’کورٹ پیکنگ‘ کے تاثر کو غلط قرار دیتے ہوئے کہا کہ سنیارٹی اور ججز ٹرانسفر دو الگ ایشوز ہیں، اگر جوڈیشل کمیشن کے 4 اراکین بائیکاٹ نہ کرتے تو پشاور ہائیکورٹ سے ایک قابل جج شامل ہو جاتا۔

’سچ بولوں تو ججز کے لیے جو نام دیگر لوگوں نے دیے وہ میرے ناموں سے اچھے ہیں، سنیارٹی اور ججز ٹرانسفر دو الگ ایشوز ہیں، سنیارٹی کے معاملے پر اپنی رائے دے چکا ہوں۔‘

چیف جسٹس یحییٰ آفریدی کے مطابق نیشنل جوڈیشل پالیسی کمیٹی کا ایجنڈا تیار کیا جاچکا ہے، جلد وزیراعظم اور اپوزیشن لیڈر کو بھیج دیا جائے گا تاکہ وہ نیشنل جوڈیشل پالیسی کمیٹی کے ایجنڈے پر اپنی سفارشات شامل کرانا چاہیں تو ممکن ہوسکے۔

چیف جسٹس یحییٰ آفریدی کا کہنا تھا کہ ججوں کی جانب سے خطوط کا لکھا جانا پرانی عادتیں ہیں آہستہ آہستہ ٹھیک ہو جائیں گی، کونسلنگ شروع ہو گئی ہے آہستہ آہستہ ٹھیک ہو جائے گا۔

’مجھے خط ملنے سے پہلے صحافیوں تک پہنچ جاتا ہے، ایک چیف جسٹس کو ایک باپ کی طرح ہونا چاہیے، آپ کے جونیئر اگر آپ کو خط لکھ رہے ہیں تو اس کا مطلب ہے وہ اپنے ایشوز کا حل چاہتے ہیں، اسلام آباد ہائیکورٹ کے خط لکھنے والے ججز سمجھتے تھے کہ لاہور والے ہو جائیں گے۔‘

جسٹس محسن اختر کیانی کیوں چیف نہیں بن سکتے؟ اس سوال کا جواب دیتے ہوئے چیف جسٹس کا کہنا تھا کہ کیا کوئی چیف جسٹس بن گیا ہے، جب ہو گا پھر بات کریں گے۔

چیف جسٹس یحییٰ آفریدی کے مطابق آئی ایم ایف وفد کو بتایا گیا ہے کہ پاکستانی عدلیہ آئین کے تحت ایک روایتی عدلیہ ہے جو ڈائیلاگ نہیں کر سکتی، کیونکہ ججوں نے حلف اٹھایا ہوا ہے اور آپ کے ساتھ اعداد و شمار کا اشتراک نہیں کر سکتے۔

’میں نے ان سے کہا کہ آپ زبردست موقع پر آئے ہیں جب نیشنل جوڈیشل پالیسی کمیٹی کام کر رہی ہے اور ہم اصلاحات پر کام کر رہے ہیں، سپریم کورٹ عدلیہ کو درست نہیں کر سکتی کیونکہ پانچ ہائیکورٹس ہیں جو ماتحت عدلیہ کو سپروائز کرتی ہیں۔‘

چیف جسٹس کے مطابق آئی ایم وفد نے کہا وہ فارن ڈائریکٹ انویسٹمنٹ کا تحفظ چاہتے ہیں ساتھ میں پروٹیکشن آف پراپرٹی رائٹس اور پروٹیکشن آف کنٹریکٹس رائٹس کے سلسلے میں بھی یقین دہانی کے خواہاں ہیں۔

’میں نے ان سے کہا کہ ہم پہلے ہی اس پر کام کر رہے ہیں، میں نے آئی ایم ایف سے کہا کہ آپ بدلے میں ہمیں کیا دے سکتے ہیں، ہمیں اگر مصنوعی ذہانت کے حوالے سے مدد چاہیے تو کیا آپ دیں گے جس پر انہوں نے ہمیں یقین دہانی کرائی ہے۔‘

چیف جسٹس کے مطابق سنیارٹی کے معاملے پر انہوں نے ایک جج کے نام پر اعتراض اٹھایا کہ یہ نام نہیں ہونا چاہیے تھا کیونکہ ان کے خیال سے اس جج کا نام پانچ سینیئر ججز میں شامل نہیں تھا۔

’لاہور ہائی کورٹ پر ججز کو اعتراض تھا وہاں سے کسی کی تعیناتی نہیں کی، ساتھی ججز کو درخواست کی تھی کہ سسٹم کو چلنے دیں، جسٹس گل حسن اورنگزیب کو سپریم کورٹ کا جج بنانا چاہتا تھا۔‘

ایکٹنگ جج لانے کی کیا ضرورت تھی؟ اس سوال پر چیف جسٹس یحییٰ آفریدی کا کہنا تھا کہ وہ انہیں سپریم کورٹ لانا چاہتے تھے، لسٹ میں ان کا نام نہیں تھا۔ ’میں نے کہا کہ مجھے ایسا بندہ چاہیے کہ جو ٹیکس میٹرز کو ڈیل کرے تو پھر کمیشن نے کہا کہ اس طرح سے آ سکتے ہیں۔‘

اسلام آباد ہائیکورٹ کے 6 ججز کی جانب سے لکھے خط کے حوالے سے چیف جسٹس یحییٰ آفریدی کا کہنا تھا کہ انہوں نے 26 اکتوبر کو حلف لینے کے بعد اسی دن ان 6 ججز کو گھر بلایا، ان کا ایشو سپریم جوڈیشل کونسل کے ایجنڈے میں سر فہرست رکھا ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں