اپوزیشن اتحاد نے کہا ہے کہ ملک میں اس وقت ناجائز حکومت ہے جو آئین کے نام سے گھبراتی ہے، ہم اپوزیشن جماعتوں کو ایک پلیٹ فارم پر اکٹھا کررہے ہیں، کل اسلام آباد میں قومی کانفرنس ہر صورت ہوگی۔
ہم گلی گلی میں ان ناجائز حکمرانوں کا احتساب کریں گے، محمود اچکزئی
اسلام آباد میں اپوزیشن رہنماؤں کے اجلاس کے بعد میڈیا سے گفتگو کرتے ہوئے پشتونخواہ میپ کے سربراہ محمود اچکزئی نے کہاکہ ہم ان قوتوں کے باغی ہیں جو ملک کو کرپشن اور مار دھاڑ سے چلاتی ہیں، ہم گلی گلی میں ان ناجائز حکمرانوں کا احتساب کریں گے۔
یہ بھی پڑھیں باقاعدہ اپوزیشن اتحاد کی تیاریاں، پہلے مرحلے پر کیا ہوا، مزید کیا ہونے جارہا ہے؟
انہوں نے کہاکہ ہم اس ناجائز اسمبلی کو نہیں مانتے، اگر یہی انداز جاری رہا تو اپنی اسمبلی لگائیں گے۔
ہمارا مقصد ملک میں آئین و قانون کی بالادستی قائم کرنا ہے، شاہد خاقان عباسی
سابق وزیراعظم پاکستان شاہد خاقان عباسی نے گفتگو کرتے ہوئے کہاکہ ہمارا مقصد ملک میں آئین و قانون کی بالادستی قائم کرنا ہے۔
انہوں نے کہاکہ اس وقت ملک میں جو حکومت قائم ہے یہ عوام کی نمائندہ نہیں، جعلی حکمران آئین کے نام سے گھبراتے ہیں۔ ہم آئین و قانون کی بالادستی کی جدوجہد کے لیے اپوزیشن جماعتوں کو ایک پلیٹ فارم پر اکٹھا کررہے ہیں۔
شاہد خاقان عباسی نے کہاکہ حکمران عوام کی رائے سے گھبراتے ہیں، کل کی کانفرنس میں آئین اور معیشت پر بات ہوگی، موجودہ حالات سے نکلنے کا واحد راستہ آئین پر عمل کرنے میں ہے۔
انسانی حقوق کے لیے آواز اٹھانے والوں کو روکا نہیں کیا جا سکتا، صاحبزادہ حامد رضا
اس موقع پر سنی اتحاد کونسل کے سربراہ صاحبزادہ حامد رضا نے کہاکہ کل کی کانفرنس ہر حال میں ہوگی، ہمارے بڑوں نے یہ ملک حاصل کیا تھا اور اب انہی کی اولادیں اسے محفوظ کریں گی۔ جمہور اور انسانی حقوق کے لیے آواز اٹھانے والوں کو روکا نہیں کیا جا سکتا۔
حکومت ڈری اور سہمی ہوئی ہے، سلمان اکرم راجا
پی ٹی آئی کے سیکریٹری جنرل سلمان اکرم راجا نے کہاکہ ہم پاکستان میں انسانی قوق کی خلاف ورزیوں پر آواز اٹھائیں گے، حکومت ڈری اور سہمی ہوئی ہے۔
اس موقع پر ناصر شیرازی نے کہاکہ کل آئین و قانون کو ماننے والی قوتیں اسلام آباد میں جمع ہوں گی، اور یہ کانفرنس ہر حال میں ہوگی۔
یہ بھی پڑھیں مولانا فضل الرحمان نے پی ٹی آئی یا اپوزیشن اتحاد میں شمولیت سے انکار کردیا
واضح رہے کہ اپوزیشن جماعتوں نے 26 اور 27 فروری کو اسلام آباد میں کانفرنس کے انعقاد کا اعلان کررکھا ہے، تاہم میڈیا رپورٹس کے مطابق انہیں حکومت کی جانب سے اجازت نہیں مل سکی۔
