بلوچستان میں دہشتگردوں کے حملے کے بعد 15 روز تک معطل رہنے والی جعفر ایکسپریس پشاور سے کوئٹہ کے لیے روانہ ہوگئی۔
وفاقی وزیر امیر مقام نے مسافروں کو پشاور سے رخصت کیا، اب یہ ٹرین کل جمعہ کو واپس پشاور جائے گی۔
پشاور کینٹ ریلوے اسٹیشن سے جعفر ایکسپریس 280مسادروں ریزرویشن کے ساتھ پشاور سے روانہ کی ہے ۔رجعفر ایکسپریس۔پشاور سے۔ پنجاب اور پھر سندھ کے بعد بلوچستان میں داخل ہوگی اور کل شام کوئٹہ پہنچے گی ۔ریلوے حکام pic.twitter.com/TJ1od51Jfu
— Ziaul haqARY (@ziaulhaq786) March 27, 2025
یہ بھی پڑھیں جعفر ایکسپریس پر حملے کے بعد کیا ہوا؟ قائمہ کمیٹی کو دی گئی بریفنگ کی تفصیلات سامنے آگئیں
وفاقی وزیر ریلوے حنیف عباسی کی جانب سے گزشتہ روز اعلان کیا گیا تھا کہ ٹرین سروس 27 مارچ سے بحال ہو جائےگی۔
مسافروں کو رخصت کرنے کے موقع پر وفاقی وزیر امیر مقام نے کہاکہ جعفر ایکسپریس پر حملے کے بعد سروس معطل تھی، حنیف عباسی نے چارج سنبھال کر جعفر ایکسپریس کی سروس کو پشاور سے بحال کردیا۔
انہوں نے کہاکہ اس سوچ کو کبھی کامیاب نہیں ہونے دیں گے کہ پاکستان میں زندگی مفلوج ہو جائے، آج عوام کا جم غفیر اس بات کا ثبوت ہے کہ دہشتگردوں کو شکست ہوگی۔
امیر مقام نے کہاکہ ہمیں سیاست سے بالاتر ہوکر امن کو بحال کرنا ہوگا، پی ٹی آئی کا وطیرہ رہا کہ صرف اسلام آباد پر جا کر چڑھائی کریں۔
انہوں نے کہاکہ خیبرپختونخوا کے عوام بھی جانتے ہیں کہ پی ٹی آئی کس کے لیے کام کر رہی ہے، کیا یہ لوگ صوبہ کی ترقی یا معاشی استحکام کے لیے کام کر رہے ہیں، بیرونی ایجنڈے کو ریلیف دینے کے لیے پی ٹی آئی اپنا کام کر رہی ہے۔
انہوں نے کہاکہ جعفر ایکسپریس کی روانگی ایک اچھا کام تھا لیکن صوبائی قیادت اچھے کام میں شریک نہیں ہوتی۔
یہ بھی پڑھیں جعفر ایکسپریس حملے کی تحقیقات میں اہم پیشرفت، 4 مبینہ سہولت کار گرفتار
واضح رہے کہ 2 ہفتے قبل بلوچستان کے علاقے بولان میں دہشتگردوں نے جعفر ایکسپریس پر حملہ کیا تھا، اور اس دوران 18 سیکیورٹی اہلکاروں سمیت 26 افراد کو شہید کردیا تھا، جبکہ جوابی کارروائی میں فورسز نے 33 دہشتگردوں کو ہلاک کردیا تھا۔
