وزیر اعظم پاکستان شہباز شریف نے ملک میں گندم کی 2 کروڑ 75 لاکھ میٹرک ٹن ریکارڈ پیداوار پر اظہارِ تشکر کرتے ہوئے کہا ہے کہ اللہ کے فضل و کرم سے ملک میں اس سال گندم کی گزشتہ 10 سالوں کی نسبت سب سے ذیادہ پیداوار ہوئی ہے، تمام صوبائی اور وفاقی ادارے گندم خریداری کا اپنا ہدف بڑھائیں تاکہ پورا سال گندم کی بلاتعطل فراہمی ممکن ہو۔
وزیراعظم شہباز شریف نے ایک اجلاس سے خطاب کرتے ہوئے کہا کہ ذخیرہ اندوزوں کے خلاف سخت کارروائی یقینی بنائی جائے۔
انہوں نے کہا کہ حکومت کی کسانوں کو معیاری بیج، کھاد کی بلاتعطل فراہمی، کسان پیکیج اور بروقت فیصلوں کی بدولت گندم کی شاندار پیداوار کا حصول ممکن ہوا، گزشتہ سال بارشوں اور سیلاب کے باوجود گندم کی بمپر کراپ حکومت کے بروقت فیصلوں اور بہترین گورننس کا منہ بولتا ثبوت ہے۔
وزیرِ اعظم نے کہا کہ تمام تر مالی مشکلات کے باوجود گندم کی بمپر پیداوار پر کاشت کار اور پوری قوم مبارک باد کی مستحق ہے۔ آئندہ سال حکومت اس سے بھی زیادہ پیداوار کے لیے حکمتِ عملی مرتب کر رہی ہے۔
گزشتہ حکومت کی نااہلی کی وجہ سے پاکستان گندم درآمد کرنے والا ملک بن گیا
شہباز شریف کا کہنا تھا کہ گزشتہ نا اہل حکومت کی بد انتظامی کی وجہ سے پاکستان گندم در آمد کرنے والا ملک بن گیا، گزشتہ حکومت نے کسانوں کو کھاد کے لیے پورا پورا دن لمبی قطاروں میں کھڑا رکھا، صوبائی و وفاقی محکمے براہِ راست کسانوں سے گندم خریدیں تاکہ کاشت کار کو بھرپور فائدہ پہنچے۔
وزیر اعظم نے ہدایت کی کہ گندم کی متعین کردہ مقدار کے حصول کے لیے درکار وسائل کو بینکوں کے ذریعے مہیا کیا جائے۔
اجلاس میں وزیرِ اعظم کو رواں سال ملک بھر میں گندم کی گزشتہ 10 سال کی نسبت 2 کروڑ 75 لاکھ میٹرک ٹن سے زیادہ پیداوار کے حوالے سے بریفنگ دی گئی۔
اجلاس میں گندم کے موجودہ ذخائر، کیری فارورڈ ذخائر، وفاقی و صوبائی محکموں کے خریداری کے اہداف اور پیش رفت سے بھی آگاہ کیا گیا۔
وزیرِ اعظم نے وفاقی وزیرِ غذائی تحفظ طارق بشیر چیمہ اور متعلقہ حکام کو مبارکباد دی اور وزارت کے اقدامات کی پذیرائی کی جبکہ تمام اداروں کو اپنے اہداف میں اضافہ کرنے کی ہدایت بھی دی۔
اجلاس میں وفاقی وزیر برائے نیشنل فوڈ سیکیورٹی طارق بشیر چیمہ، مشیر وزیراعظم احد خان چیمہ، معاون خصوصی طارق باجوہ، نگران صوبائی وزیر برائے انڈسٹریز پنجاب ایس ایم تنویر اور متعلقہ اعلیٰ حکام نے شرکت کی۔
دریں اثنا وزیراعظم شہباز شریف نے اپنی ایک ٹوئٹ میں بھی گندم کی ریکارڈ پیدوار پر اظہار تشکر کیا ہے۔
الحمدللہ اس سال پاکستان میں گندم کی گزشتہ10سال کی نسبت شاندار فصل (Bumper Crop) ہوئی ہے۔ سیلاب،معاشی مشکلات کےباوجودحکومت نےکسانوں کو بروقت کھاد، معیاری بیج، کسان پیکیج کی فراہمی یقینی بنائی۔ حکومت کاآئندہ ہدف ملکی ضروریات پوری ہونےکےبعد پاکستان کو پھر سےگندم برآمد کرنے والا ملک…
— Shehbaz Sharif (@CMShehbaz) April 30, 2023
