ایران کے شہر بندر عباس میں بندرگاہ پر دھماکے سے 4 افراد جاں بحق، 500 سے زائد زخمی ہوگئے ہیں
ایرانی میڈیا کے مطابق بندر عباس کی شاہد راجئی بندرگاہ پر واقع ایک انتظامی عمارت میں زوردار دھماکا ہوا، جس سے500 افراد زخمی ہوگئے جبکہ اس واقعے میں 4 افراد جاں بحق بھی ہوئے ہیں۔
یہ بھی پڑھیں: ایران بم دھماکوں کی ذمہ داری داعش نے قبول کر لی
دھماکے کے بعد امدادی کارروائیاں شروع کردی گئی ہیں اور زخمیوں کو اسپتال منتقل کیا جا رہا ہے، کئی افراد کے ملبے تلے دبے جانے کا خدشہ موجود ہے۔
دھماکا سینا کنٹینر یارڈ میں ہوا، جو پورٹس اینڈ میری ٹائم آرگنائزیشن سے وابستہ ہے۔
ہرموزگان کے کرائسز مینجمنٹ چیف مہرداد حسن زادہ نے کہا کہ یہ دھماکا بندرگاہ کے صحن میں ذخیرہ کیے گئے کئی کنٹینرز کے پھٹنے سے ہوا۔
یہ بھی پڑھیں: حسن نصراللہ کی موت، اسرائیل کو ایران سے ردعمل کا انتظار کیوں؟
نیشنل ایرانین آئل ریفائننگ اینڈ ڈسٹری بیوشن کمپنی (این آئی او آر ڈی سی) نے ایک بیان میں کہا ہے کہ دھماکے کا علاقے میں ریفائنریوں، ایندھن ذخیرہ کرنے والے ٹینکوں یا تیل کی پائپ لائنوں سے کوئی تعلق نہیں ہے۔
بیان میں کہا گیا ہے کہ بندر عباس کی تنصیبات میں آپریشن بلا تعطل جاری ہے، مزید کہا گیا کہ بندرگاہ کے حکام کی مدد کے لیے قریبی تیل کمپنیوں کی فائر فائٹنگ اور ہنگامی ٹیمیں تیار ہیں۔
