کرناٹک کےشہر تمکورو میں جلسۂ عام سے خطاب کرنے کے دوران اذان بلند ہوئی تو کانگریس کے رہنما راہول گاندھی نے اپنی تقریر روک دی۔
بھارتی میڈیا کے مطابق راہول گاندھی کرناٹک اسمبلی انتخاب کے سلسلے میں تمکورو میں خطاب کر رہے تھے جس کے دوران قریبی مسجد سے اذان کی آواز آئی اس پر کانگریسی لیڈر کے سی وینوگوپال ان کے پاس آئے اور اذان کی جانب توجہ دلائی جس پر راہول گاندھی فوراً خاموش ہو گئے اور اشارے سے دیگر افراد کو بھی خاموش ہونے کو کہا۔
اس موقع کی ایک ویڈیو سوشل میڈیا پر پوسٹ کی گئی ہے جس میں دیکھا جا سکتا ہے کہ راہول گاندھی عوام سے خطاب کرنے کے دوران اذان کے باعث اچانک رک گئے اور پھر جب اذان مکمل ہو گئی تو انہوں نے اپنی تقریر دوبارہ شروع کی۔
#WATCH कर्नाटक: कांग्रेस नेता राहुल गांधी ने तुमकुरु में एक जनसभा को संबोधित करने के दौरान अज़ान की आवाज सुनकर अपने भाषण को रोका। pic.twitter.com/Qu7N0IjbqO
— ANI_HindiNews (@AHindinews) May 1, 2023
قبل ازیں اپنے خطاب میں راہول گاندھی نے ریاست کی بی جے پی حکومت کے ساتھ ساتھ مرکز کی مودی حکومت کو بھی شدید تنقید کا نشانہ بنایا۔
انہوں نے لوگوں سے اپیل کی کہ وہ اس بار اپنی حکومت بنائیں اور مضبوطی کے ساتھ بنائیں۔ انہوں نے کہا کہ گزشتہ مرتبہ بھی آپ نے بی جے پی کی حکومت نہیں بنائی تھی لیکن بی جے پی نے اراکین اسمبلی کو خرید کر اور جمہوریت کو نیست و نابود کر اپنی حکومت بنا لی۔
راہول گاندھی نے الزام عائد کیا کہ گزشتہ تین سالوں میں بی جے پی نے صرف بدعنوانی کی ہے۔ ان کا کہنا تھا کہ کرناٹک کے لوگ بھی بی جے پی حکومت کو 40 فیصد کی حکومت کہتے ہیں کیوں کہ وہ ہر کام میں عوام سے 40 فیصد کمیشن لیتے ہیں۔
