پاکستان کی ابھرتی ہوئی اداکارہ عینا آصف نے ڈپریشن سے متعلق اپنے بیان کی وضاحت کر دی۔
عینا آصف نے حال ہی میں ایک پوڈکاسٹ میں شرکت کی جہاں انہوں نے کہا کہ انہیں لگتا ہے کہ ڈپریشن سے متعلق دیے گئے اپنے بیان کو وہ بہتر انداز میں بیان کر سکتی تھیں۔
انہوں نے مزید کہا کہ ڈپریشن اور تھراپی پر بات کرنا آج بھی ایک ممنوع موضوع سمجھا جاتا ہے اور جب کوئی یہ کہتا ہے کہ ڈپریشن کا مطلب ہے کہ آپ کا اللہ پر ایمان کمزور ہے، تو یہ بات بہت تکلیف دہ ہوتی ہے اور انسان سوچنے لگ جاتا ہے کہ میرا اللہ بھی مجھ سے پیار نہیں کرتا۔
یہ بھی پڑھیں: اداکارہ عینا آصف سوشل میڈیا صارفین کے نشانے پر کیوں؟
اداکارہ نے کہا کہ اللہ آپ سے ہمیشہ پیار کرتا ہے اگر پوری دنیا آپ کے ساتھ نہیں تو اس سے فرق نہیں پڑتا کیونکہ اللہ آپ کے ساتھ ہے۔ ان کا مزید کہنا تھا کہ ابھی بھی ڈپریشن اور ذہنی صحت کو بیماری نہیں سمجھا جاتا اور کہا جاتا ہے آپ اس کو دماغ سے کنٹرول کر لیں گے۔
عینا آصف نے کہا کہ دعا اور علاج دونوں ساتھ ساتھ چل سکتے ہیں۔ ذہنی صحت کے مسائل کو سنجیدگی سے لینا چاہیے۔ انہوں نے کہا کہ خدانخواستہ اگر کسی کو کینسر جیساق مرض لاحق ہو جائے تو آپ صرف نمازیں نہیں پڑھیں گے بلکہ دوائیوں کے ذریعے بھی اس کا علاج کریں گے کیونکہ دونوں چیزیں اہم ہیں اور آپ ایک چیز کو نہیں چھوڑ سکتے۔
واضح رہے کہ عینا آصف نے حال ہی میں ندا یاسر کے مارننگ شو میں شرکت کی تھی، جہاں انہوں نے ذہنی صحت اور ان کے مسائل پر کھل کر بات کی۔
یہ بھی پڑھیں: عینا آصف کو دوران شو لڑکے نے پروپوز کردیا
انہوں نے ڈپریشن پر تبصرہ کرتے ہوئے ایک متنازعہ بحث چھیڑ دی کہ اگرچہ نماز اہم ہے لیکن ڈپریشن ایک سنگین ذہنی بیماری ہے جس کے لیے پیشہ ورانہ مدد کی ضرورت ہوتی ہے۔
عینا آصف نے کہا، ’کبھی کبھار تھراپسٹ واقعی برا سلوک کرتے ہیں، آپ کا بچہ علاج کے لیے جاتا ہے اور وہ کہتے ہیں، نماز پڑھو‘۔ ان کا کہنا تھا کہ ’نماز بیشک سکون دیتی ہے، اور ہر مسلمان کو ادا کرنی چاہیے یہ عمل انتہائی اچھا ہے۔ مگر جب میں ڈپریس ہوں تو اس لمحے میں میں کیا کروں‘؟
اداکارہ عینا آصف کو مائی ری، بے بی باجی، ہم تم، پنجرا اور پہلی سی محبت جیسے کامیاب ڈراموں سے شہرت ملی اور اس وقت جڑواں اور پرورش جیسے ڈراموں میں اپنی اداکاری کی وجہ سے داد سمیٹ رہی ہیں
