پاکستان تحریک انصاف کے صدر چوہدری پرویز الٰہی نے کہا ہے کہ انتخابات ہر صورت ہوں گے اور تحریک انصاف کامیابی حاصل کرے گی۔ نگران وزیراعلیٰ پنجاب محسن نقوی ہر برے کام کا چیمپیئن بنا ہوا ہے۔
لاہور میں میڈیا سے گفتگو کرتے ہوئے انہوں نے کہا کہ الیکشن میں شریفوں کا جو شر ہو گا وہ دنیا دیکھے گی۔ افسوس ہے کہ میرے گھر پر وار کیا گیا اور ایسا کرنے والوں سے اللہ پوچھے گا۔
چوہدری پرویز الٰہی کا کہنا تھا کہ محسن نقوی کی حکومت ختم ہو چکی ہے۔ پنجاب میں جو کچھ بھی ہو رہا ہے اس کا ذمہ دار نگران وزیراعلیٰ ہی ہے اور شہباز شریف بھی اس میں شامل ہے۔
انہوں نے کہا کہ ہر چیز ہمارے پاس ہے ان کے پاس کچھ بھی نہیں۔ ذاتیات اور بدلوں کا کیس ہم نے اللہ پر چھوڑ دیا ہے۔ تین جگہ عدالت نے ہمیں ریلیف دیا ہے۔
واضح رہے کہ چوہدری پرویز الٰہی کے گھر پر پولیس نے دھاوا بولا تھا اور ان کی گرفتاری کی کوشش بھی کی گئی تھی جس کے بعد تحریک انصاف نے رد عمل کا اظہار کیا تھا اس کے علاوہ وفاقی حکومت نے موقف اختیار کیا تھا کہ ہمارا اس سے کوئی تعلق نہیں ہے۔
