وزیراعظم شہباز شریف نے مکہ مکرمہ میں سعودی ولی عہد محمد بن سلمان کی جانب سے شاہی دیوان میں دیے گئے ظہرانے میں بطور مہمانِ خصوصی شرکت کی اور انہیں دورہ پاکستان کی دعوت دی جسے سعودی ولی عہد نے قبول کیا۔
سعودی ولی عہد نے وزیراعظم کا خصوصی استقبال کیا اور خود گاڑی چلا کر انہیں ظہرانے میں لے گئے۔
یہ بھی پڑھیے: دورہ سعودی عرب: وزیراعظم شہباز شریف نے عمرہ کی سعادت حاصل کی
محمد بن سلمان بن عبدالعزیز آل سعود نے وزیراعظم شہباز شریف کو ظہرانے میں پرجوش انداز میں خوش آمدید کہا اور دونوں رہنماؤں کے درمیان غیر رسمی بات چیت بھی ہوئی۔ ملاقات میں پاکستان اور مملکت سعودی عرب کے درمیان گہرے اسٹریٹجک اور برادرانہ تعلقات کی توثیق کی گئی۔
وزیراعظم شہباز شریف نے حکومتِ پاکستان اور پاکستانی عوام کی جانب سے خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کو عید کی مبارکباد پیش کی اور دنیا بھر سے آنے والے حجاج کرام کی خدمت اور سعودی عرب کی شاندار میزبانی کو سراہا۔ انہوں نے خادم الحرمین الشریفین اور ولی عہد کی جانب سے حجاج کے لیے محفوظ اور روحانی طور پر پُراثر حج کے انتظامات پر شکریہ ادا کیا۔
ظہرانے میں مشرق وسطیٰ کے اہم رہنماؤں کے ساتھ سعودی کابینہ کے ارکان اور اعلیٰ سعودی سِول اور عسکری قیادت نے شرکت کی۔
اس موقع پر فیلڈ مارشل جنرل عاصم منیر، نائب وزیراعظم اسحاق ڈار، وزیر اطلاعات عطا اللہ تارڑ اور وفاقی داخلہ محسن نقوی بھی موجود تھے۔
یہ بھی پڑھیے: وزیرِاعظم شہباز شریف 2 روزہ دورہ سعودی عرب پر روانہ، عید الاضحیٰ سعودی ولی عہد کے ہمراہ منائیں گے
وزیراعظم نے پاکستان اور بھارت کے درمیان حالیہ کشیدگی کے دوران سعودی عرب کے مثبت کردار اور علاقائی و عالمی سطح پر امن و استحکام کے فروغ کے لیے مملکت کی مستقل کوششوں کو سراہا۔ انہوں نے بھارتی جارحیت کے مقابلے میں پاکستان کی ذمہ دارانہ صبر و تحمل کی پالیسی پر زور دیا اور کہا کہ جنوبی ایشیا میں پائیدار امن صرف بات چیت کے ذریعے ہی ممکن ہے۔
دونوں رہنماؤں نے غزہ کی سنگین انسانی صورتحال پر بھی تفصیلی بات چیت کی۔ انہوں نے عالمی برادری پر زور دیا کہ وہ اپنی اخلاقی اور قانونی ذمہ داریاں پوری کرے، اور فلسطینی مسئلے کے منصفانہ و پائیدار حل کے لیے اپنی غیر متزلزل حمایت کا اعادہ کیا۔
یہ بھی پڑھیے: سعودی عرب اور خلیجی ممالک میں عیدالاضحی مذہبی جوش و جذبے سے منائی جا رہی ہے، مناسک حج اختتامی مراحل میں
وزیراعظم شہباز شریف نے سیاسی، اقتصادی اور سیکیورٹی شعبوں میں دوطرفہ تعاون میں بڑھتی ہوئی پیش رفت پر اطمینان کا اظہار کیا۔ دونوں رہنماؤں نے قیادت کے مشترکہ وژن اور دونوں برادر اقوام کی خواہشات کے مطابق اس اسٹریٹجک شراکت داری کو مزید بلندیوں تک پہنچانے پر اتفاق کیا۔
دونوں رہنماؤں نے پاکستان اور سعودی عرب کے درمیان کثیرالجہتی تعلقات کو مزید مستحکم کرنے کے عزم کا اعادہ کیا۔ وزیراعظم شہباز شریف نے ولی عہد کو جلد از جلد پاکستان کے سرکاری دورے کی دعوت دی، جسے سعودی ولی عہد نے قبول کیا۔
