برطانوی دفترِ خارجہ نے بیرونی انٹیلیجنس ایجنسی ایم آئی 6 کی پہلی خاتون سربراہ مقرر کی جانیوالی بلیز میٹرویلی کا دفاع کیا ہے، جن کے خاندانی پس منظر کے حوالے سے ایک میڈیا رپورٹ میں انکشاف کیا گیا ہے کہ ان کے دادا نازی جرمنی کے لیے لڑ چکے تھے۔
برطانوی دفترِ خارجہ نے مؤقف اختیار کیا ہے کہ میٹرویلی کے متنازع خاندانی پس منظر نے دراصل ان کے اس عزم کو مزید مضبوط کیا ہے کہ وہ برطانیہ کو بیرونی خطرات سے محفوظ رکھنے کے لیے کام کریں۔
یہ بھی پڑھیں: برطانوی خفیہ ایجنسی ایم آئی 6 کی پہلی خاتون سربراہ کون ہیں؟
برطانوی اخبار ڈیلی میل نے انکشاف کیا کہ اکتوبر میں ایم آئی 6 کی ڈائریکٹر کا عہدہ سنبھالنے والی بلیز میٹرویلی دراصل کونسٹنٹائن ڈوبروولسکی کی پوتی ہیں، جو سوویت ریڈ آرمی سے منحرف ہوکر ہٹلر کی افواج میں شامل ہو گئے تھے اور جنہیں نازی مقبوضہ یوکرین میں مبینہ مظالم کے سبب ‘قصائی‘ کے لقب سے یاد کیا جاتا ہے۔
اس انکشاف کے بعد برطانیہ کے دفترِ خارجہ، دولتِ مشترکہ اور ترقیاتی امور کے ایک نمائندے نے جمعے کے روز بیان جاری کرتے ہوئے کہا کہ بلیز میٹرویلی نہ تو اپنے دادا کو جانتی تھیں، نہ ہی کبھی ان سے ملاقات ہوئی۔
مزید پڑھیں:گوگل کو برطانیہ میں کیا تبدیلیاں کرنا پڑسکتی ہیں؟
’ان کا خاندانی پس منظر مشرقی یورپ کی طرح پیچیدگی اور تقسیم سے عبارت ہے، اور مکمل طور پر سمجھا نہیں جا سکا۔۔۔یہی پیچیدہ ورثہ اُن کے اس عزم میں شامل ہے کہ بطور ایم آئی 6 کی آئندہ سربراہ، وہ تنازعات کی روک تھام اور برطانوی عوام کو آج کے دشمن ریاستوں سے درپیش جدید خطرات سے بچانے کے لیے بھرپور کردار ادا کریں۔‘
ڈیلی میل کے مطابق، ڈوبروولسکی نازی جرمنی کی ایس ایس ٹینک یونٹ میں خدمات انجام دے چکے تھے، بعد ازاں وہ نازی فوجی پولیس میں شامل ہوئے، جو یہودیوں، مزاحمت کاروں اور سیاسی قیدیوں کے قتلِ عام میں ملوث تھی۔
مزید پڑھیں:انسانی بال سے بھی باریک برطانیہ میں دنیا کی سب سے چھوٹا وائلن تیار
ڈوبروولسکی کے بارے میں خیال کیا جاتا ہے کہ وہ 1943 میں مارے گئے تھے، ان کی بیوہ بعد ازاں برطانیہ منتقل ہو گئیں، جہاں انہوں نے جارجیا سے تعلق رکھنے والے ڈیوڈ میٹرویلی سے شادی کی۔
