وزارت داخلہ نے ویزا اسکینڈل سے متعلق میڈیا میں آنے والی رپورٹس کو گمراہ کن اور جھوٹ پر مبنی قرار دیتے ہوئے سختی سے تردید کی ہے۔
وزارت کی جانب سے جاری کردہ اعلامیے میں کہا گیا ہے کہ میڈیا کے بعض حلقوں میں ویزا اسکینڈل کے حوالے سے جو خبریں چل رہی ہیں وہ من گھڑت، جھوٹ اور پروپیگنڈا پر مبنی ہیں اور حقیقت کے بالکل منافی ہیں۔
یہ بھی پڑھیں: دنیا کے مضبوط ترین پاسپورٹس کی فہرست میں پاکستان کہاں کھڑا ہے؟
اعلامیے کے مطابق افغان شہریوں کو جاری کیے گئے انٹری ویزے پاکستان میں موجود متعلقہ سفارتخانوں کی جانب سے جاری کیے گئے تھے اور اس عمل میں وزارت داخلہ کا کوئی براہِ راست کردار نہیں تھا۔
وزارت داخلہ نے واضح کیا ہے کہ انٹری ویزا اسکینڈل میں ملوث عناصر کی نشاندہی کے بعد وفاقی تحقیقاتی ایجنسی (ایف آئی اے) کی جانب سے ان کے خلاف ایف آئی آر درج کی جا چکی ہے اور تحقیقات جاری ہیں۔
یہ بھی پڑھیں: افغان پناہ گزینوں کی وطن واپسی جاری،افغان شہری پاکستانیوں کے احسان مند
یہ معاملہ اُس وقت سامنے آیا جب حالیہ دنوں میں بعض میڈیا رپورٹس میں دعویٰ کیا گیا کہ بڑی تعداد میں افغان شہریوں کو غیرقانونی یا مشکوک طریقے سے ویزے جاری کیے گئے، جن کے پیچھے مبینہ بدعنوان نیٹ ورک کام کر رہا تھا۔
رپورٹس میں یہ تاثر دیا گیا کہ افغان شہری پاکستان کے داخلی نظام کو چکمہ دے کر یا افسران کی مبینہ ملی بھگت سے انٹری حاصل کررہے ہیں۔ ان خبروں نے عوامی سطح پر تشویش پیدا کی جس پر وزارت داخلہ نے وضاحت جاری کی کہ نہ صرف انٹری ویزے سفارتی ذرائع سے جاری ہوئے بلکہ معاملے کی شفاف تحقیقات بھی جاری ہیں۔
