اداکارہ حمیرا اصغر کی موت کیسے ہوئی؟ یہ ایسا سوال ہے جو اس وقت ہر پاکستانی جاننے کی کوشش کر رہا ہے اور پولیس اس معاملے میں اپنا کلیدی کردار ادا کر رہی ہے، کڑیاں سلجھتی جائیں گی اور ایک دن اس بات کا تعین ہو ہی جائے گا کہ موت کی اصل وجہ کیا تھی۔
اس حوالے سے ڈی آئی جی ساؤتھ اسد رضا نے بتایا ہے کہ لاش خراب ہونے کی بو 5 سے 40 دن تک ہوتی ہے، اس مدت کے دوران حمیرا اصغر کے ہمسائے بھی اپنے فلیٹ میں نہیں تھے۔
اسد رضا کے مطابق حمیرا اصغر کے پڑوس والا فلیٹ بھی کافی عرصہ خالی تھا، جہاں حمیرا اصغر کی لاش تھی ساتھ والے کمرے میں واش روم کی کھڑکی کھلی تھی، ہوسکتا ہے کہ کھڑکی کے ذریعے لاش کی بو باہر نکلتی رہی ہو۔
مزید پڑھیں: اداکارہ حمیرا اصغر کی کئی مہینے پرانی لاش، سنسنی خیز انکشافات سامنے آگئے
اسد رضا نے مزید کہا ہے کہ فلیٹ کی منیجمنٹ کمیٹی چوکیدار اور ہمسائے کو بھی شامل تفتیش کیا جائے گا، حمیرا اصغر کراچی سے لاہور سفر کرتی رہتی تھیں، ہوسکتا ہے کہ لوگوں نے سمجھا ہو کہ حمیرا اصغر لاہور گئی ہوں۔
ڈی آئی جی اسد رضا کے مطابق 7 اکتوبر کو یہ واقعہ پیش آیا، واقعے کے بعد 3 دن میں ایک بار چوکیدار نے حمیرا کو فون بھی کیا لیکن جواب نہیں آیا۔ 7 اکتوبر کے بعد حمیرا اصغر کے ایک دوست نے بھی ایک بار فون کیا تھا۔
